បន្ទាយមានជ័យ៖ នៅថ្ងៃទី៨ ខែឧសភា ឆ្នាំ២០២៥ លោក ហ៊ុយ ទូច មន្រ្តីជំនាញបសុពេទ្យ នៃ​មន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បាន​ដឹកនាំ​មន្រ្តីចុះពង្រឹង​ការងារត្រួត​ពិនិត្យ​សត្វពាហនៈនាំចូលពីប្រទេសថៃ​ ដើម្បីអនុវត្តតាមខ្លឹមសារសេចក្តីណែនាំប្រកាសព័ត៌មាន ស្តីពីការកើតមានជំងឺឈាមខ្មៅ ឬជំងឺអង់ត្រាក់​ លើសត្វពាហានៈនៅប្រទេសថៃ និងផ្សព្វផ្សាយ​ជាមួយ​សមត្ថកិច្ចកងការពារព្រំដែន ​ឲ្យជួយអន្តរាគមន៍ទប់ស្កាត់ការលួចនាំចូលសត្វដោយខុសច្បាប់ ។

លោក ហ៊ុយ ទូច ប្រធានការិល័យបសុពេទ្យ នៃមន្ទីរកសិកម្មខេត្តបន្ទាយមានជ័យ បានឲ្យដឹងថា បន្ទាប់​ពី​ទទួល​បានសេចក្តីប្រកាសព័ត៌មាន​របស់​ក្រសួង​កសិកម្ម ចុះថ្ងៃទី៦ ខែឧសភា ២០២៥ ស្ដីពីករណីកើតមានជំងឺឈាមខ្មៅ ឬជំងឺអង់ត្រាក់ លើសត្វពាហនៈនៅក្នុងប្រទេសថៃ និង​ការដាក់ឲ្យអនុវត្តការហាមឃាត់ជាបណ្ដោះអាសន្ន លើការនាំចូលសត្វពាហនៈ និងផលិតផលសាច់សត្វ ពីច្រកព្រំដែនទាំងអស់នៃប្រទេសថៃ។

លោកបានដឹកនាំមន្ត្រីជំនាញនៃការិយាល័យបសុពេទ្យ ចុះធ្វើការប្រាស័យទំនាក់ទំនង​ជាមួយ​ក្រុមហ៊ុន​នាំចូលសត្វគោក្របីចំនួនពីរក្រុមហ៊ុន ឱ្យផ្អាកការបញ្ជាទិញ ​និងផ្អាកការនាំចូល​គោក្របី​ពីប្រទេសថៃ រង់ចាំការណែនាំថ្មីពីក្រសួងកសិកម្ម។

ជាមួយនឹងការចុះទំនាក់ទំនងនេះមន្រ្តីបសុពេទ្យបានធ្វើការត្រួតពិនិត្យសត្វគោកក្របីដែល​ក្រុមហ៊ុន​បាននាំចូលមុនសេចក្តីជូនដំណឹងនៅតាមក្រោលនីមួយៗ គឺឃើញថា សត្វគោរក្របីទាំងនោះ​មាន​សុខភាពល្អពុំមានជំងឺអ្វីឡើយ ទើបអនុញាតអោយដឹកឆ្លងកាត់ទៅប្រទេសវៀតណាម។

ដើម្បីឲ្យកាន់តែមានប្រសិទ្ធភាព ​មន្ត្រីជំនាញរបស់លោកក៏បានធ្វើការផ្សព្វផ្សាយជាមួយនឹង​សមត្ថកិច្ច​កងការពារព្រំដែនឲ្យជួយអន្តរាគមន៍ទប់ស្កាត់​ការលួចនាំចូលសត្វដោយ​ខុសច្បាប់​ផងដែរ។ ក្រៅពីការ​ទប់ស្កាត់​នៅ​តាមព្រំដែន​ជាមួយ​ក្រុមហ៊ុន​នាំចូល​ មន្ត្រី​បានធ្វើការ​ចុះត្រួត​ពិនិត្យ​ស្ថានភាព​សុខភាពសត្វ គោ ក្របី ជ្រូក ​នៅ​តាម​សត្តឃាតដ្ឋាន​ជាប្រចាំមុនចូលពិឃាត​ដើម្បីធានាថា​សត្វគ្មានជំងឺឆ្លង ដើម្បីការពារដល់អ្នកទទួលទានសាច់ក្នុងខេត្តឃើញថា សត្វទាំងអស់នេះ មានសុខភាពល្អជាធម្មតាទេ ពុំមានអ្វីគត់សំគាល់នោះឡើយ ។

លោក ហ៊ុយ ទូច បានបន្តទៀតថា លោកបានធ្វើការផ្សព្វផ្សាយដល់ប្រជាកសិករ និងភ្នាក់ងារពេទ្យសត្វភូមិ ត្រូវតាមដានសុវត្ថិភាពសត្វគ្រប់ពេល​ ដឹងរាយការណ៍ មកអាជ្ញាធរដែនដី និងមន្ត្រីពេទ្យសត្វ ឲ្យបានទាន់ពេលដើម្បីគ្រប់គ្រង ​ស្ថានភាព បាននៅពេលមានជំងឺឆ្លងកើតឡើង​ជាយថាហេតុ ៕ ឃិនសារិទ្ធ