មេដឹកនាំនៃប្រទេសគុយបា ម៉ុងហ្គោលី និងវេណេហ្ស៊ុយអេឡា បានធ្វើដំណើរទៅទីក្រុងមូស្គូ កាលពីថ្ងៃពុធ (ទី៧ ខែឧសភា) នៅមុនពេលចូលរួមការប្រារព្ធទិវាជ័យជំម្នះរបស់ប្រទេសរុស្ស៊ី។

គួរបញ្ជាក់ថា ទិវាជ័យជម្នះ ដែលត្រូវបានប្រារព្ធនៅក្នុងប្រទេសរុស្ស៊ី នៅថ្ងៃទី៩ ខែឧសភា បានក្លាយជាថ្ងៃឈប់សម្រាកមិនពាក់ព័ន្ធនឹងសាសនាដ៏សំខាន់បំផុតរបស់ប្រទេស។

ព្យុហយាត្រា ឬក្បួនដង្ហែដ៏ធំមួយ កាត់តាមទីលានក្រហម និងពិធីផ្សេងទៀត គូសបញ្ជាក់ពីកិច្ចប្រឹងប្រែងរបស់ទីក្រុងមូស្គូ ក្នុងការបង្ហាញពីឥទ្ធិពលរបស់ខ្លួន និងពង្រឹងសម្ព័ន្ធភាពដែលខ្លួនបានបង្កើតឡើង ខណៈពេលដែលកំពុងស្វែងរកកម្លាំងទប់ទល់ប្រទេសលោកខាងលិច ស្របពេលមានជម្លោះ នៅអ៊ុយក្រែន។

ប្រធានាធិបតីវេណេស៊ុយអេឡា លោក Nicolas Maduro និងប្រធានាធិបតីគុយបា លោក Miguel Diaz-Canel ស្ថិតនៅក្នុងបញ្ជីភ្ញៀវកិត្តិយស ដែលក៏រួមមានប្រធានាធិបតីចិន លោក ស៊ី ជីនពីង (Xi Jinping) និងប្រធានាធិបតីប្រេស៊ីល លោក Luiz Inácio Lula da Silva ផងដែរ។

សម្រាប់ដំណើរទស្សនកិច្ចផ្លូវរដ្ឋតាមការអញ្ជើញរបស់លោក Putin នៅក្នុងសេចក្តីថ្លែងការណ៍ជាលាយលក្ខណ៍អក្សរ នៅពេលលោកទៅដល់ទីក្រុងមូស្គូ ប្រធានាធិបតីចិន លោក ស៊ី បានលើកឡើងថា ប្រទេសចិន និងរុស្ស៊ី នឹងធ្វើការរួមគ្នាការពារសមិទ្ធផលជោគជ័យនៃសង្គ្រាមលោកលើកទី២ ហើយប្រឆាំងដាច់ខាតនឹងអនុត្តរភាពនិយម និងគោលនយោបាយប្រើអំណាច។ លោក ស៊ី បានពោលសរសើរថា ប្រទេសចិន និងរុស្ស៊ី គឺជា «អ្នកជិតខាងដ៏ល្អដែលមិនអាចផ្ដាច់ចេញពីគ្នាបាន ជាមិត្តពិតដែលចែករំលែកភាពសុខដុមរមនាជាមួយគ្នា និងជាដៃគូអាចទុកចិត្តបានដែលជួយគ្នាទៅវិញទៅមក ដើម្បីទទួលបានភាពជោគជ័យ»។

នៅថ្ងៃព្រហស្បតិ៍ (ទី៨ ខែឧសភា) លោក Putin បានស្វាគមន៍ប្រធានាធិបតីចិន លោក ស៊ី ជីនពីង ដើម្បីពិភាក្សាបញ្ហាផ្សេងៗ នៅវិមានក្រឹមឡាំង ដែលទីក្រុងមូស្គូសង្ឃឹមថា នឹងផ្តល់ការជំរុញផ្នែកការទូត សម្រាប់មេដឹកនាំរុស្ស៊ី ក្នុងពេលវេលាដ៏សំខាន់ អំឡុងពេលមានសង្គ្រាមជាមួយអ៊ុយក្រែន៕