ប្រធានាធិបតីរុស្ស៊ី លោក Vladimir Putin និងប្រធានាធិបតីវេណេហ្ស៊ុយអេឡា លោក Nicolas Maduro កាលពីថ្ងៃពុធ (ទី៧ ខែឧសភា) បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ នៅក្នុងពិធីមួយដែលត្រូវបានផ្សាយតាមកញ្ចក់ទូរទស្សន៍រដ្ឋ។

ជាមួយគ្នានេះ ទីភ្នាក់ងារសារព័ត៌មាន Interfax របស់រុស្ស៊ី បានរាយការណ៍ថា មេដឹកនាំទាំង២ ក៏បានពិភាក្សាផងដែរ អំពីថាមពល និងប្រេង អំឡុងកិច្ចពិភាក្សារបស់ពួកលោក នៅទីក្រុងមូស្គូ។

នៅក្នុងកិច្ចព្រមព្រៀងនេះ រុស្ស៊ី និងវេណេហ្ស៊ុយអេឡា បានកំណត់ថា ពួកគេនឹងលើកកម្ពស់គំនិតផ្តួចផ្តើមរួមគ្នានៅក្នុងរង្វង់អង្គការ OPEC+ វេទិកាប្រទេសនាំចេញឧស្ម័ន និងអង្គការផ្សេងទៀត ក្នុងវិស័យថាមពល។

កិច្ចព្រមព្រៀងនេះបានកំណត់ថា៖ «ភាគីទាំង២ នឹងលើកកម្ពស់ការអភិវឌ្ឍរយៈពេលវែងប្រកបដោយតុល្យភាព និងស្ថិរភាពនៃទីផ្សារថាមពលពិភពលោក ដោយមិនប្រើប្រាស់វិធីសាស្ត្រប្រកួតប្រជែងមិនយុត្តិធម៌»។

ប្រទេសទាំង២ បានយល់ព្រមសហការរុករក និងអភិវឌ្ឍតំបន់ប្រេង និងឧស្ម័នថ្មី តាមរយៈការបណ្តាក់ទុនរួមគ្នា ក៏ដូចជាពង្រីកប្រតិបត្តិការជួញដូរប្រេងផងដែរ។

កតិកាសញ្ញានេះក៏បង្ហាញពីកិច្ចសហប្រតិបត្តិការកាន់តែជិតស្និទ្ធ រវាងរុស្ស៊ី និងវេណេហ្ស៊ុយអេឡា នៅអង្គការសហប្រជាជាតិ និងអង្គការផ្សេងទៀត និងក្នុងតំបន់គ្រប់គ្រងអាវុធ រួមជាមួយនឹងការប្រឆាំងរួមគ្នាចំពោះការដាក់ទណ្ឌកម្មឯកតោភាគី។

សង្រ្គាមរយៈពេល ៣ឆ្នាំរបស់រុស្ស៊ី នៅអ៊ុយក្រែន បាននាំឲ្យមានការបែកបាក់ ក្នុងទំនាក់ទំនងរបស់ខ្លួនជាមួយរដ្ឋលោកខាងលិចភាគច្រើន ហើយបានជំរុញឲ្យទីក្រុងមូស្គូពង្រឹងទំនាក់ទំនងជាមួយប្រទេសផ្សេងទៀតដែលមានបំណងរួមគ្នា ប្រឆាំងនឹងឥទ្ធិពលនៃអ្វីដែលវិមានក្រឹមឡាំងហៅថា «សមូហភាពលោកខាងលិច» ក្នុងនោះរួមទាំងសហរដ្ឋអាមេរិកផងដែរ៕