ប្រធានាធិបតីបារាំង កាលពីថ្ងៃពុធ (ទី៧ ខែឧសភា) បាននិយាយថា លោកនឹងជំរុញឲ្យសហភាពអឺរ៉ុប (EU) បញ្ចប់ការដាក់ទណ្ឌកម្មលើប្រទេសស៊ីរី នៅពេលដែលពួកគេត្រូវពិនិត្យឡើងវិញនូវវិធានការនោះ ក្នុងខែមិថុនា ហើយបញ្ចុះបញ្ចូលសហរដ្ឋអាមេរិកឲ្យធ្វើតាមដែរ ក៏ដូចជាបន្តរក្សាវត្តមានកងទ័ពរបស់ខ្លួននៅទីនោះ ដើម្បីធានាស្ថិរភាពរបស់ស៊ីរី។

អំឡុងពេលថ្លែងរួមជាមួយប្រធានាធិបតីបណ្តោះអាសន្នរបស់ស៊ីរី លោក Ahmed al-Sharaa ដែលបានបង្ហាញវត្តមាននៅទីក្រុងប៉ារីស សម្រាប់ដំណើរទស្សនកិច្ចលើកដំបូងទៅកាន់អឺរ៉ុប គិតចាប់តាំងពីបានផ្តួលរំលំអតីតប្រធានាធិបតីលោក Bashar al-Assad កាលពីខែធ្នូឆ្នាំមុន លោក Emmanuel Macron បានលើកឡើងថា វាជាកាតព្វកិច្ចរបស់សហគមន៍អន្តរជាតិ ក្នុងការបន្ធូរបន្ថយស្ថានភាពលំបាកផ្នែកសេដ្ឋកិច្ចរបស់ប្រទេសស៊ីរី។

លោក Macron បានបញ្ជាក់ថា៖ «ខ្ញុំបានប្រាប់លោកប្រធានាធិបតីថា ប្រសិនបើលោកបន្តដំណើរនៅលើផ្លូវរបស់លោក យើងនឹងធ្វើដូចគ្នា។ នោះគឺថា ជាដំបូង ការដកទណ្ឌកម្មរបស់អឺរ៉ុបជាបណ្តើរៗ ហើយបន្ទាប់មកយើងក៏នឹងបញ្ចុះបញ្ចូលដៃគូអាមេរិករបស់យើងឲ្យអនុវត្តតាមចំណាត់ការនេះដែរ»។ បន្ទាប់មក លោកបានបន្ថែមថា លោកនឹងស្នើឲ្យសហភាពអឺរ៉ុបព្រមអនុញ្ញាតឲ្យទណ្ឌកម្មអស់សុពលភាពនៅថ្ងៃទី១ ខែមិថុនា។

ដោយធនាគារពិភពលោកប៉ាន់ប្រមាណថា ការចំណាយលើការកសាងឡើងវិញរបស់ស៊ីរីមានចំនួនជាង ២៥០ពាន់លានដុល្លារ លោក Sharaa ចង់ឲ្យមានការបន្ធូរបន្ថយទណ្ឌកម្ម ដើម្បីចាប់ផ្តើមឡើងវិញនូវដំណើរការសេដ្ឋកិច្ចដែលរងការខូចខាតដោយសារសង្រ្គាមស៊ីវិលរយៈពេល ១៤ឆ្នាំ។ ក្នុងអំឡុងពេលនោះ សហរដ្ឋអាមេរិក សហភាពអឺរ៉ុប និងអង់គ្លេស បានដាក់ទណ្ឌកម្មយ៉ាងតឹងរ៉ឹងលើរដ្ឋាភិបាលរបស់លោក Assad។

សហភាពអឺរ៉ុប បានដកទណ្ឌកម្មមួយចំនួន ខណៈខ្លះទៀតដែលកំណត់គោលដៅលើបុគ្គល និងអង្គភាពនានា ត្រូវផុតកំណត់ក្នុងខែមិថុនា៕