ទ្រីយ៉ាត្លុង៖ ការប្រកួតកីឡាទ្រីយ៉ាត្លុងជ្រើសជើងឯកថ្នាក់ជាតិឆ្នាំ២០២១ បានបញ្ចប់ដោយជោគជ័យ ក្រោយដំណើរការប្រកួតរយៈពេល ៣ថ្ងៃកាលពីចុងសប្ដាហ៍កន្លងទៅនៅតំបន់ឆ្នេរកម្សាន្ដនាខេត្តកែប បន្ទាប់ពីមានកិច្ចសហការរៀបចំ និងលើកទឹកចិត្តពីរដ្ឋបាលខេត្ត។ នេះបើតាមការបញ្ជាក់របស់លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា។
អគ្គលេខាធិការសហព័ន្ធដដែលបញ្ជាក់ថា ក្នុងការប្រកួត ៣ថ្ងៃនេះមានកីឡាករ-កីឡាការិនី ៥៧នាក់បានចូលរួមប្រកួតលើ ៣វិញ្ញាសាធំៗ ។ ប៉ុន្ដែមុនការប្រកួតសហព័ន្ធក៏បានរៀបចំបោះជុំរុំហ្វឹកហាត់ ក៏ដូចជាការបើកវគ្គបណ្ដុះបណ្ដាលបច្ចេកទេស ដែលជំរុញឲ្យការប្រកួតនេះ ដំណើរការយ៉ាងរលូនប្រកបដោយផ្លែផ្កា ទាំងសមត្ថភាព និងបច្ចេកទេសផងដែរ។ ចំពោះលទ្ធផលវិញ្ញាសាអាគ័រត្លុង (ហែលទឹក និងរត់) លេខ១ បានទៅកីឡាករ សៀង ណូរ៉ា ក្លិបក្រសួងការពារជាតិ។ វិញ្ញាសាឌូអាត្លុងបុរស-នារី (រត់+ជិះកង់+រត់) លេខ១ បានទៅលើកីឡាករ កាង ធឿន និងកីឡាការិនី អ៊ួន ចន្ទភត្រា មកពីក្លិបក្រសួងមហាផ្ទៃ ខណៈវិញ្ញាសាទ្រីយ៉ាត្លុងបុរស-នារី (ហែលទឹក+ជិះកង់+រត់) លេខ១ បានទៅកីឡាករ នាង ពេជ្រពិសិដ្ឋ និងកីឡាការិនី អ៊ួន ចន្ទភត្រា មកក្លិបក្រសួងមហាផ្ទៃដូចគ្នា។
ឆ្លងកាត់ការប្រកួតនេះ លោក ងិន សុខបញ្ញា បានបញ្ជាក់ថា ទោះបីសមិទ្ធផលនេះមិនទាន់ឈានដល់កម្រិតមេដាយស៊ីហ្គេម តែវាជាម៉ែត្រវាស់ស្ទង់សមត្ថភាពបច្ចេកទេសមួយសម្រាប់ក្រុមជម្រើសជាតិ ដើម្បីជំរុញ និងលើកទឹកចិត្តបន្ថែមក្នុងគោលដៅធ្វើឲ្យកីឡាករ-កីឡាការិនីមានសមត្ថភាព និងបច្ចេកទេសកាន់តែរីកចម្រើនបន្ថែមទៀត ដើម្បីដំណើរឆ្ពោះទៅរកការប្រកួតដោយស្មើមុខមាត់លើឆាកអន្ដរជាតិ ពិសេសស៊ីហ្គេមឆ្នាំ២០២៣ នៅកម្ពុជា។ ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប បានបង្ហាញក្ដីសោមមនស្សរីករាយក្នុងការសហការ ជាមួយសហព័ន្ធរៀបចំការប្រកួតជើងឯកថ្នាក់ជាតិនេះ ពិសេសការជ្រើសរើសខេត្តកែបដើម្បីត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣ លើប្រភេទកីឡាទ្រីយ៉ាត្លុង។ តាមរយៈនេះ ឯកឧត្តមបានប្ដេជ្ញាចិត្តបន្ដសហការរៀបចំ ទាំងសន្ដិសុខ សណ្ដាប់ធ្នាប់ និងអនាម័យតាមដងផ្លូវជាដើម ដើម្បីរួមចំណែកអភិវឌ្ឍវិស័យកីឡាជាតិផង និងដំណើរឆ្ពោះទៅព្រឹត្តិការណ៍ជាប្រវត្តិសាស្ដ្រនៅកម្ពុជាផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
