ប្រធានាធិបតីអាមេរិកលោក Donald Trump កាលថ្ងៃពុធ (ទី៧ ខែឧសភា) បាននិយាយថា នឹងមានព័ត៌មានបន្ថែមទៀតនៅថ្ងៃបន្ទាប់ ជុំវិញលទ្ធភាពពីការមានសំណើថ្មី សម្រាប់កិច្ចព្រមព្រៀងដោះលែងចំណាប់ថ្នូរ និងបទឈប់បាញ់ នៅតំបន់ហ្កាហ្សា។

លោក Trump បាននិយាយនៅឯសេតវិមានថា៖ «ការពិភាក្សាជាច្រើនកំពុងបន្តមាន អំពីតំបន់ហ្កាហ្សា នាពេលនេះ។ អ្នកនឹងបានដឹងប្រហែលជាក្នុងរយៈពេល ២៤ម៉ោងបន្ទាប់»។

ប្រភពសន្តិសុខអេហ្ស៊ីបចំនួន ២ បានប្រាប់សារព័ត៌មាន Reuters កាលពីចុងខែមេសាថា ការចរចាដែលត្រូវបានធ្វើឡើងនៅទីក្រុងគែរ ដើម្បីឈានដល់បទឈប់បាញ់នៅតំបន់ហ្កាហ្សា គឺកៀកនឹងដំណាក់កាលដ៏សំខាន់នៃការទម្លាយភាពទាល់ច្រកហើយ។ តែកាលពីថ្ងៃទី៧ ខែឧសភា មន្ត្រីស្និទ្ធនឹងកិច្ចប្រឹងប្រែងសម្របសម្រួលនេះ បាននិយាយថា មិនមានសំណើថ្មីនោះឡើយ។

មន្ត្រីរូបនេះបានបញ្ជាក់ថា៖ «មានកិច្ចប្រឹងប្រែងកាន់តែខ្លាំងឡើងៗពីអ្នកសម្របសម្រួល ហើយទំនាក់ទំនងមិនដែលត្រូវបានបញ្ឈប់ ប៉ុន្តែមិនទាន់មានសំណើជាក់លាក់នៅឡើយទេ។ ក្រុមហាម៉ាសនៅតែទទូច ចង់បានកិច្ចព្រមព្រៀងបទឈប់បាញ់ទាំងស្រុង តាមការទាមទាររបស់ខ្លួន ជាថ្នូរនឹងការបញ្ចប់សង្គ្រាម ខណៈដែលអ៊ីស្រាអែលមិនចង់បញ្ចប់សង្គ្រាម»៕