យោធានិយាយនៅថ្ងៃព្រហស្បតិ៍នេះថា ប៉ាគីស្ថានបានបាញ់ទម្លាក់យានដ្រូន ១២គ្រឿង ហោះចេញពីប្រទេសឥណ្ឌា ដែលបានបំពានដែនអាកាសរបស់ពួកគេ រយៈពេល ១ថ្ងៃ ក្រោយឥណ្ឌា វាយប្រហារលើគោលដៅជាច្រើននៅក្នុងប្រទេសមួយនេះ បង្កឲ្យមានក្តីបារម្ភពីជម្លោះយោធាទ្រង់ទ្រាយធំជាងនេះ រវាងប្រទេសជិតខាងប្រដាប់អាវុធនុយក្លេអ៊ែរទាំង ២ ។

លោក Ahmed Sharif Chaudhry គឺជាអ្នកនាំពាក្យយោធាប៉ាគីស្ថាន និយាយថា ឥណ្ឌា បានបញ្ជូនយានដ្រូន Israeli Harop ទៅកាន់ទីតាំងជាច្រើនកន្លែង រួមទាំងនៅទីក្រុងធំៗបំផុតទាំង ២ គឺទីក្រុង Karachi និងទីក្រុង Lahore ហើយបំណែកយានដ្រូន ត្រូវបានប្រមូល ។

វីដេអូរបស់អង្គការក្រៅរដ្ឋាភិបាលប៉ាគីស្ថាន Edhi នៅថ្ងៃព្រហស្បតិ៍នេះ ឃើញក្រុមអ្នកស្រុក និងក្រុមនគរបាល បានជួបជុំគ្នានៅជិតផ្ទះរងការខូចខាត និងបំណែកយានដ្រូននៅកន្លែងកើតហេតុ ជាទីដែលយានដ្រូនត្រូវបានបាញ់ស្កាត់នៅតំបន់រស់នៅរបស់អ្នកស្រុកជិតរដ្ឋធានី Karachi ។

ក្រុមអាជ្ញាធរ និយាយថា គ្មានគ្រោះថ្នាក់ត្រូវបានរាយការណ៍នោះទេ មកទល់នឹងពេលនេះ ស្របពេលដែលភាពតានតឹងឡើងកម្តៅខ្លាំងរវាងប្រទេសទាំង ២ ។

ឥណ្ឌា បានវាយប្រហារហេដ្ឋារចនាភេរវករនៅប៉ាគីស្ថានកាលពីព្រឹកថ្ងៃពុធ រយៈពេល ២សប្តាហ៍ ក្រោយពួកគេចោទប្រកាន់ប្រទេសអ៊ិស្លាមមួយនេះថា ជាប់ពាក់ព័ន្ធនឹងការវាយប្រហារតំបន់កាស្មៀររបស់ឥណ្ឌា ដែលមនុស្ស ២៦នាក់ ភាគច្រើននៃពួកគេគឺជាភ្ញៀវទេសចរហិណ្ឌូ ត្រូវបានសម្លាប់ ។

ខណៈពេលនោះដែរ ទីក្រុង Islamabad បានច្រានចោលការចោទប្រកាន់របស់ឥណ្ឌា ហើយនិងសន្យាសងសឹកចំពោះការវាយប្រហារដោយមីស៊ីល ហើយពួកគេបាននិយាយផងដែរថា ពួកគេបានបាញ់ទម្លាក់យន្តហោះចម្បាំងឥណ្ឌា ៥គ្រឿង ។ 

ទោះបីជាយ៉ាងណាក៏ដោយ ស្ថានទូតឥណ្ឌាប្រចាំនៅទីក្រុងប៉េកាំង ចាត់ទុកសេចក្តីរាយការណ៍យន្តហោះចម្បាំងត្រូវបានបាញ់ទម្លាក់ថា ជាព័ត៌មានមិនពិត ៕