ប្រធានាធិបតីរុស្ស៊ី លោក Vladimir Putin បានថ្លែងអំណរគុណដល់ប្រធានាធិបតីចិន លោក ស៊ី ជីនពីង (Xi Jinping) ដែលបានចូលរួមក្នុងព្រឹត្តិការណ៍ប្រារព្ធខួបលើកទី៨០ គិតចាប់តាំងពីមានជ័យជម្នះយ៉ាងឧត្តុង្គឧត្តមលើលោក អាដុល ហ៊ីត្លែរ (Adolf Hitler) អំឡុងសង្គ្រាមលោកលើកទី២ ហើយបាននិយាយថា ប្រទេសទាំង២ ឥឡូវនេះ បានឈរជាមួយគ្នាប្រឆាំងនឹង «លទ្ធិណាស៊ីនិយម»។

វត្តមានរបស់លោក ស៊ី នៅឯពិធីប្រារព្ធខួប ក្នុងសប្តាហ៍នេះ ផ្តល់នូវការជំរុញដ៏សំខាន់មួយ សម្រាប់មេដឹកនាំវិមានក្រឹមឡាំង ដែលបានពិពណ៌នាអំពីសង្រ្គាមរបស់លោក នៅក្នុងប្រទេសអ៊ុយក្រែនថា ជាការតស៊ូប្រឆាំងនឹងពួកណាស៊ីសម័យទំនើប តាំងពីដើមដំបូងមក។

តែអ៊ុយក្រែន និងសម្ព័ន្ធមិត្ត បានច្រានចោលការលើកឡើងនោះថា ដោយចាត់ទុកថា ជាការក្លែងបន្លំដ៏អាក្រក់ ហើយបានចោទប្រកាន់ទីក្រុងមូស្គូថា បានបើកការលុកលុយតាមបែបចក្រពត្តិនិយម។

នៅថ្ងៃព្រហស្បតិ៍ (ទី៨ ខែឧសភា) នេះ លោក Putin បានប្រាប់លោក ស៊ី ថា៖ «ជ័យជម្នះលើហ្វាស៊ីសនិយម ដែលសម្រេចបានដោយការលះបង់យ៉ាងធំធេង គឺមានសារៈសំខាន់យូរអង្វែង។ រួមគ្នាជាមួយមិត្តចិនរបស់យើង យើងឈរយ៉ាងរឹងមាំការពារការពិតជាប្រវត្តិសាស្រ្ត ការពារការចងចាំនៃព្រឹត្តិការណ៍ឆ្នាំសង្រ្គាម និងប្រឆាំងនឹងវត្តមាននៅសម័យទំនើបនៃពួកណាស៊ីនិយម និងយោធានិយម»។

ចំណែកមេដឹកនាំចិន លោក ស៊ី បានលើកឡើងថា ប្រទេសទាំង២ ក្នុងនាមជាមហាអំណាចពិភពលោក និងសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ នឹងធ្វើការរួមគ្នា ដើម្បីទប់ទល់នឹង «វិធានការឯកតោភាគីនិយម និងការសម្លុតកំហែង» ដែលជាការនិយាយយោងជាក់ស្តែងសំដៅដល់សហរដ្ឋអាមេរិក។

លោក ស៊ី បានប្រាប់លោក Putin ថា៖ «នៅចំពោះមុខការប្រឆាំងជាអន្តរជាតិនៃចរន្តឯកតោភាគី និងអាកប្បកិរិយាគំរាមកំហែងអនុត្តរភាព ប្រទេសចិននឹងធ្វើការជាមួយរុស្ស៊ី ដើម្បីរែកពន់ទទួលខុសត្រូវជាពិសេស ក្នុងនាមជាមហាអំណាចពិភពលោក»៕