ប្រធានាធិបតីអាល្លឺម៉ង់ លោក Frank-Walter Steinmeier នៅថ្ងៃព្រហស្បតិ៍ (ទី៨ ខែឧសភា) បានរិះគន់ «ការនិយាយកុហកប្រវត្តិសាស្ត្រ» របស់រុស្ស៊ី ជុំវិញសង្គ្រាម នៅអ៊ុយក្រែន ខណៈដែលលោកបានកត់សម្គាល់ពីការបរាជ័យរបស់ពួកណាហ្ស៊ីដែលបានបញ្ចប់សង្គ្រាមលោកលើកទី២ នៅអឺរ៉ុប កាលពី៨០ ឆ្នាំកន្លងទៅ។

នៅក្នុងសុន្ទរកថាទៅកាន់សភា ក្នុងទីក្រុងប៊ែរឡាំង លោក Steinmeier បានសម្តែងការដឹងគុណ ចំពោះទាហានសម្ព័ន្ធមិត្ត និងចលនាតស៊ូ ដែលបានកម្ចាត់ពួកណាហ្ស៊ីអាល្លឺម៉ង់ «ដោយបានលះបង់យ៉ាងធំធេងទាំងកម្លាំងកាយ និងចិត្ត»។

ជាមួយគ្នានេះ លោកក៏បានសរសើរដល់កងទ័ពក្រហមសូវៀត ដែលកងទ័ពរុស្ស៊ី និងអ៊ុយក្រែន បានប្រកៀកស្មាគ្នាប្រយុទ្ធ សម្រាប់តួនាទីរបស់ពួកគេ ដែលជួយនាំឲ្យមានជ័យជម្នះលើពួកណាហ្ស៊ី ដោយកត់សម្គាល់ថា វាបានរំដោះជំរុំប្រមូលផ្តុំ Auschwitz នៅក្នុងប្រទេសប៉ូឡូញដែលកាន់កាប់ដោយពួកណាហ្ស៊ី។

អំឡុងពិធីរំលឹកខួប ៨ ឧសភា នៃការចុះចាញ់ដោយគ្មានលក្ខខណ្ឌរបស់ណាហ្ស៊ីអាល្លឺម៉ង់ ចំពោះសម្ព័ន្ធមិត្ត លោក Steinmeier បានប្រាប់សភា Bundestag ថា៖ «យើងមិនភ្លេចព្រឹត្តិការណ៍នេះទេ។ ប៉ុន្តែដោយសារតែព្រឹត្តិការណ៍នេះ យើងប្រឆាំងយ៉ាងម៉ឺងម៉ាត់ ចំពោះការនិយាយកុហកប្រវត្តិសាស្ត្ររបស់វិមានក្រឹមឡាំង នៅថ្ងៃនេះ»។

រុស្ស៊ីបានបើកប្រតិបត្តិការវាយលុករយៈពេល ៣ឆ្នាំ លើអ៊ុយក្រែន ដោយចាត់ទុកថា ជាការប្រយុទ្ធប្រឆាំងនឹង «ពួកណាហ្ស៊ីនិយម» ហើយបានបញ្ជូនកេរ្តិ៍ដំណែលសម័យសង្គ្រាមរបស់ខ្លួន ដើម្បីបង្ហាញអំពីភាពត្រឹមត្រូវនៃសង្រ្គាមនេះ។ ប៉ុន្តែលោក Steinmeier បានបញ្ជាក់ថា៖ «សង្រ្គាមប្រឆាំងនឹងអ៊ុយក្រែន មិនមែនជាការបន្តនៃការប្រយុទ្ធប្រឆាំងនឹងពួកហ្វាស៊ីសនិយមនោះទេ»។

លោកបានសង្កត់ធ្ងន់ថា៖ «សង្រ្គាមលុកលុយរបស់លោក (ប្រធានាធិបតី Vladimir) Putin ដែលជាយុទ្ធនាការប្រឆាំងនឹងប្រទេសសេរី និងប្រជាធិបតេយ្យ មិនមានអ្វីដូចគ្នានឹងការប្រយុទ្ធប្រឆាំងរបបផ្តាច់ការណាហ្ស៊ី ក្នុងសង្គ្រាមលោកលើកទី២ នោះឡើយ»៕