ការប្រយុទ្ធគ្នារវាងយន្តហោះចម្បាំងប៉ាគីស្ថាន ផលិតដោយចិន និងយន្តហោះចម្បាំង Rafale របស់ឥណ្ឌា ផលិតដោយបារាំង នឹងត្រូវបានសិក្សាត្រួតពិនិត្យយ៉ាងដិតដល់បំផុត ដោយយោធាទូទាំងសកលលោក ដែលកំពុងស្វែងរកការយល់ដឹងបន្ថែមដ៏មានតម្លៃ ដែលអាចមានប្រយោជន៍សម្រាប់ជម្លោះនាពេលអនាគត។

យន្តហោះចម្បាំងប៉ាគីស្ថាន J-10 ដែលផលិតដោយចិន បានបាញ់ទម្លាក់យន្តហោះយោធាឥណ្ឌា យ៉ាងតិច ២គ្រឿងកាលពីថ្ងៃពុធសប្ដាហ៍នេះ នេះបើតាមប្រភពមន្ត្រីអាមេរិកពីររូបបានប្រាប់សារព័ត៌មានរ៉យទ័រ ដោយរឿងនេះគឺជាជំហានដ៏សំខាន់បំផុតមួយសម្រាប់យន្តហោះចម្បាំងទំនើបរបស់ទីក្រុងប៉េកាំង។

ការប៉ះទង្គិចពីលើអាកាសគឺជាឱកាសដ៏កម្រមួយសម្រាប់យោធានានាដើម្បីសិក្សាពីសមត្ថភាពអនុវត្តជាក់ស្ដែងរបស់អាកាសយានិក យន្តហោះចម្បាំង និងមីស៊ីលបាញ់ពីអាកាសទៅអាកាសនៅក្នុងការប្រយុទ្ធយ៉ាងសកម្ម ហើយប្រើប្រាស់ចំណេះដឹងទាំងនោះដើម្បីត្រៀមរៀបចំកងកម្លាំងអាកាសរបស់ពួកគេសម្រាប់ការប្រយុទ្ធដែលអាចកើតមាន។

អ្នកជំនាញបាននិយាយថា ការប្រើប្រាស់អាវុធទំនើបៗក្នុងសង្រ្គាមទាំងឡាយ នឹងត្រូវបានវិភាគយ៉ាងលម្អិតបំផុតនៅជុំវិញពិភពលោក រួមទាំងនៅក្នុងប្រទេសចិន និងសហរដ្ឋអាមេរិក ដែលអ្នកទាំងពីរកំពុងត្រៀមសម្រាប់លទ្ធភាពនៃជម្លោះ ដោយសារតែរឿងកោះតៃវ៉ាន់ ឬបញ្ហានៅក្នុងតំបន់ឥណ្ឌូប៉ាស៊ីហ្វិក កាន់តែទូលំទូលាយ៕