រដ្ឋមន្ត្រីការពារជាតិអាមេរិក លោក Pete Hegseth បានចេញសេចក្តីណែនាំផ្ទៃក្នុងដល់មន្ទីរបញ្ចកោណ ឱ្យចាប់ផ្តើមបណ្តេញទាហានកែភេទ ដែលមិនត្រូវបានជ្រើសរើសឱ្យចាកចេញដោយខ្លួនឯង ត្រឹមថ្ងៃទី០៦ ខែមិថុនា ខាងមុខ នេះបើយោងតាមអនុស្សរណៈដែលទទួលបានដោយសារព័ត៌មានរ៉យទ័រ។ មន្ទីរបញ្ចកោណ មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

ការសម្រេចចិត្តនេះត្រូវថ្កោលទោសភ្លាមៗដោយសកម្មជនសិទ្ធិប្ដូរភេទ ដោយលោកស្រី Jennifer Levi នាយកជាន់ខ្ពស់នៃក្រុមអ្នកច្បាប់គាំទ្រជនស្រឡាញ់ភេទដូចគ្នា LGBTQ បាននិយាយថា "នេះជារឿងដ៏អាម៉ាស់"។ លោកស្រីបន្ថែមថា "នេះផ្ដេសផ្ដាសខ្លាំងណាស់ក្នុងការតាមដាន និងបណ្ដេញមនុស្សចេញពីជួរយោធា ដែលបំពេញតាមស្តង់ដារត្រឹមត្រូវ និងហ៊ានដាក់ជីវិតលើជួរមុខដើម្បីការពារប្រទេស"។

អនុស្សរណៈរបស់លោក Hegseth បង្ហាញថា រដ្ឋបាលរបស់លោកប្រធានាធិបតី Donald Trump មានបំណងចាត់វិធានការឆាប់រហ័សដើម្បីដកសមាជិកទាហានដែលប្តូរភេទរាប់ពាន់នាក់ បន្ទាប់ពីសេចក្តីសម្រេចរបស់តុលាការកំពូលកាលពីថ្ងៃអង្គារ បានជម្រះផ្លូវឱ្យបម្រាមនោះចូលជាធរមាន។ ក្នុងអនុស្សរណៈនេះ លោក Hegseth និយាយថា ទាហានកែភេទដែលមានកាតព្វកិច្ចសកម្ម អាចកំណត់អត្តសញ្ញាណខ្លួនឯងសម្រាប់ "ការចាកចេញដោយស្ម័គ្រចិត្ត" ពីកងកម្លាំងប្រដាប់អាវុធអាមេរិក រហូតដល់ថ្ងៃទី០៦ ខែមិថុនា ហើយកងទ័ពដែលស្ថិតក្នុងកងកម្លាំងបម្រុង មានពេលរហូតដល់ថ្ងៃទី០៧ ខែកក្កដា។

លោក Trump បានចេញក្រឹត្យមួយនៅថ្ងៃដំបូងនៃតំណែងរបស់លោកនៅថ្ងៃទី២០ ខែមករា ដោយបញ្ជាក់ថា រដ្ឋាភិបាលអាមេរិកនឹងទទួលស្គាល់តែពីរភេទប៉ុណ្ណោះ គឺភេទប្រុស និងភេទស្រី ហើយថាភេទពីកំណើតមិនអាចត្រូវផ្លាស់ប្តូរបានទេ៕