ប្រធានាធិបតីអាមេរិក លោក Donald Trump បានអំពាវនាវកាលពីថ្ងៃព្រហស្បតិ៍ (០៨ ឧសភា) ឱ្យមានបទឈប់បាញ់ដោយគ្មានលក្ខខណ្ឌរយៈពេល ៣០ថ្ងៃរវាងភាគីជម្លោះ រុស្ស៊ី និងអ៊ុយក្រែន ដោយព្រមានថា ទីក្រុងវ៉ាស៊ីនតោន និងដៃគូរបស់ខ្លួន នឹងដាក់ទណ្ឌកម្មធ្ងន់ៗបន្ថែមទៀត ប្រសិនបើបទឈប់បាញ់នោះមិនត្រូវបានគោរព។

អ៊ុយក្រែន បានសម្តែងការត្រៀមខ្លួនដើម្បីទទួលយកសំណើរបស់សហរដ្ឋអាមេរិក ដើម្បីអនុម័តបទឈប់បាញ់ជាបន្ទាន់រយៈពេល ៣០ថ្ងៃ ខណៈរុស្ស៊ី បានស្នើសុំបទឈប់បាញ់តែ ៣ថ្ងៃប៉ុណ្ណោះ ដើម្បីឱ្យស្របពេលខួបលើកទី៨០ នៃការបញ្ចប់សង្គ្រាមលោកលើកទីពីរ នៅថ្ងៃព្រហស្បតិ៍សប្ដាហ៍នេះ។

លោក Trump បាននិយាយនៅក្នុងការបង្ហោះតាមប្រព័ន្ធផ្សព្វផ្សាយសង្គមថា "ប្រសិនបើបទឈប់បាញ់ ៣០ថ្ងៃ មិនត្រូវបានគោរពទេ នោះសហរដ្ឋអាមេរិក និងដៃគូរបស់ខ្លួននឹងដាក់ទណ្ឌកម្មបន្ថែមទៀត"។ លោកបន្តថា "បទឈប់បាញ់នេះ នឹងកសាងផ្លូវឆ្ពោះទៅរកកិច្ចព្រមព្រៀងសន្តិភាព"។

លោក Trump តែងនិយាយថា លោកចង់បញ្ចប់សង្រ្គាមនៅអ៊ុយក្រែន ប៉ុន្តែរដ្ឋបាលរបស់លោកក៏បានគំរាមបោះបង់ការប៉ុនប៉ងរបស់ខ្លួនក្នុងការសម្របសម្រួលកិច្ចព្រមព្រៀងមួយដែរ ប្រសិនបើរុស្ស៊ី និងអ៊ុយក្រែន មិនដើរទៅមុខ។ ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃព្រហស្បតិ៍ថា លោកបានប្រាប់លោក Trump ក្នុងកិច្ចសន្ទនាតាមទូរសព្ទថា ទីក្រុងគីវ បានត្រៀមជាស្រេចសម្រាប់បទឈប់បាញ់ ៣០ថ្ងៃជាមួយរុស្ស៊ី ដែលអាច "ចាប់ផ្តើមនៅនាទីនេះ"៕