អ៊ុយក្រែន និងរុស្ស៊ី បានចោទប្រកាន់គ្នាទៅវិញទៅមកថាបានបំពានលើបទឈប់បាញ់រយៈពេលបីថ្ងៃដែលត្រូវបានប្រកាសដោយលោក Vladimir Putin កាលពីសប្តាហ៍មុន ហើយបានចូលជាធរមានកាលពីថ្ងៃព្រហស្បតិ៍៨ឧសភាសប្ដាហ៍នេះ។

រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយថា រុស្ស៊ីបានបំពានបទឈប់បាញ់ ចំនួន៧៣៤លើក ចាប់តាំងពីបទឈប់បាញ់ បានចាប់ផ្តើមមក ដោយបន្ថែមថា ទីក្រុងមូស្គូបានអនុវត្តប្រតិបត្តិការវាយលុក ចំនួន ៦៣ដង។  

លោកបាននិយាយថា តួលេខទាំងនោះគឺសម្រាប់អំឡុងពេលពាក់កណ្តាលអធ្រាត្រដល់ថ្ងៃត្រង់ម៉ោងក្នុងស្រុក ប៉ុណ្ណោះ។

ទីក្រុង Kyiv បានអះអាងថា ការបំពានបានកើតឡើងនៅក្នុងតំបន់ភាគខាងជើង និងភាគខាងកើតទីក្រុង Sumy របស់អ៊ុយក្រែន។

ការិយាល័យរដ្ឋអាជ្ញាប្រចាំតំបន់បាននិយាយថា មនុស្សម្នាក់បានស្លាប់ និងពីរនាក់បានរងរបួសនៅពេលកងកម្លាំងរុស្ស៊ីបានទម្លាក់គ្រាប់បែកពីលើអាកាសទៅលើតំបន់លំនៅដ្ឋាននៅជិតព្រំដែនក្នុងតំបន់ Sumy ភាគឦសាន។

ប៉ុន្តែប៉ុន្មាននាទីបន្ទាប់ពីការចោទប្រកាន់ចេញពីលោក Sybiha ទីក្រុងមូស្គូបានឆ្លើយតបនឹងការអះអាងរបស់ខ្លួនប្រឆាំងនឹងក្រុង Kyiv។

ដោយដកស្រង់ពីក្រសួងការពារជាតិរុស្ស៊ី ប្រព័ន្ធផ្សព្វផ្សាយរដ្ឋបានរាយការណ៍ថា អ៊ុយក្រែនបានបំពានបទឈប់បាញ់ចំនួន ៤៨៨ ដង៕