រដ្ឋាភិបាលរបស់ប្រទេសនូវែលហ្សេឡង់ បាននិយាយនៅថ្ងៃសុក្រ ទី៩ ខែឧសភានេះថា ខ្លួននឹងចំណាយ ប្រាក់៤៥៧លានដុល្លារអាមេរិកនៅក្នុងថវិកាឆ្នាំ២០២៥របស់ខ្លួនសម្រាប់ដំណើរការកែប្រែ និងផ្តល់សំណងសម្រាប់កុមារ យុវជនវ័យក្មេង និងមនុស្សពេញវ័យងាយរងគ្រោះ ដែលត្រូវបានរំលោភបំពានក្នុងការថែទាំរបស់រដ្ឋ។

ការស៊ើបអង្កេតជាសាធារណៈកាលពីឆ្នាំមុន បានរកឃើញថា កុមារ និងមនុស្សពេញវ័យងាយរងគ្រោះប្រមាណ២០០.០០០នាក់នៅក្នុងរដ្ឋ និងការថែទាំផ្អែកលើជំនឿ បានជួបប្រទះនូវទម្រង់នៃការរំលោភបំពានមួយចំនួន ដែលបានបង្ខំឱ្យនាយករដ្ឋមន្ត្រី លោក Christopher Luxon កាលពីខែវិច្ឆិកា ចេញសុំទោសជាប្រវត្តិសាស្ត្រដល់ជនរងគ្រោះ និងក្រុមគ្រួសាររបស់ពួកគេ។

លោកស្រី Erica Stanford រដ្ឋមន្ត្រីសម្របសម្រួលសម្រាប់ការឆ្លើយតបរបស់រដ្ឋាភិបាលចំពោះការស៊ើបអង្កេត បានប្រាប់អ្នកសារព័ត៌មាននៅក្នុងសន្និសីទសារព័ត៌មាននៅទីក្រុង Auckland ថា សំណងនេះមិនរាប់បញ្ចូលការទាមទារដែលនៅជាមួយក្រុមប្រឹក្សាសាលារៀន អង្គការផ្អែកលើជំនឿ ឬអ្នកផ្តល់សេវាមិនមែនរដ្ឋផ្សេងទៀត។

ការស៊ើបអង្កេតដែលបានធ្វើឡើងក្នុងឆ្នាំ២០១៨ ត្រូវបានពង្រីកដើម្បីរួមបញ្ចូលនៅព្រះវិហារ និងស្ថាប័នផ្អែកលើជំនឿផ្សេងទៀត បន្ទាប់ពីមានការអំពាវនាវពីជនរងគ្រោះ និងអ្នកដទៃ។