អនុប្រធានាធិបតីអាមេរិក លោក JD Vance បាននិយាយកាលពីថ្ងៃព្រហស្បតិ៍ (០៨ ឧសភា) ថា ឥណ្ឌា និងប៉ាគីស្ថាន គួរតែកាត់បន្ថយភាពតានតឹង ប៉ុន្តែលោកក៏បានបន្ថែមថា សហរដ្ឋអាមេរិក មិនអាចគ្រប់គ្រងប្រទេសជិតខាងអាស៊ី ដែលមានអាវុធនុយក្លេអ៊ែរទាំងពីរនេះបានទេ ហើយសង្រ្គាមរវាងពួកគេនឹងមិនមែនជា "រឿងពាក់ព័ន្ធនឹងកិច្ចការរបស់អាមេរិកឡើយ"។

លោក Vance បាននិយាយនៅក្នុងបទសម្ភាសន៍មួយនៅលើកម្មវិធី Fox News ថា "សហរដ្ឋអាមេរិក ចង់ឱ្យភាពតានតឹងនេះកាត់បន្ថយឱ្យបានលឿនតាមដែលអាចធ្វើទៅបាន ប៉ុន្តែអាមេរិកក៏មិនអាចគ្រប់គ្រងប្រទេសទាំងនេះបានដែរ"។

លោកបានបន្ថែមថា "អ្វីដែលអាចធ្វើបានពេលនេះ គឺព្យាយាមលើកទឹកចិត្តភាគីទាំងអស់ឱ្យបន្ធូរបន្ថយភាពតានតឹង ប៉ុន្តែទីក្រុងវ៉ាស៊ីនតោន នឹងមិនចូលរួមក្នុងសង្រ្គាម ដែលមិនមែនជារឿងរបស់អាមេរិកឡើយ ហើយក៏មិនមានអ្វីពាក់ព័ន្ធជាមួយសមត្ថភាពរបស់អាមេរិក ក្នុងការអាចគ្រប់គ្រងរឿងនេះដែរ"។

គួរឱ្យដឹងថា ឥណ្ឌាបានក្លាយជាដៃគូកាន់តែសំខាន់របស់អាមេរិក ខណៈទីក្រុងវ៉ាស៊ីនតោន ព្យាយាមទប់ឥទ្ធិពលចិន នៅអាស៊ី ចំណែកប៉ាគីស្ថាន ក៏នៅតែជាសម្ព័ន្ធមិត្តរបស់អាមេរិក ទោះបីជាសារៈសំខាន់របស់ប្រទេសនេះសម្រាប់ទីក្រុងវ៉ាស៊ីនតោន បានថយចុះបន្តិច បន្ទាប់ពីការដកទ័ពអាមេរិកនៅឆ្នាំ២០២១ ពីប្រទេសជិតខាងអាហ្វហ្គានីស្ថានក៏ដោយ៕