ឯកអគ្គរដ្ឋទូតអាមេរិកថ្មីប្រចាំប្រទេសប៉ាណាម៉ាកាលពីថ្ងៃព្រហស្បតិ៍ បានធានាដល់ពលរដ្ឋរបស់ប្រទេសនេះថា កិច្ចព្រមព្រៀងដែលបានចុះហត្ថលេខាដោយប្រទេសទាំងពីរកាលពីខែមុន មិនអនុញ្ញាតឲ្យដក មូលដ្ឋានទ័ពអាមេរិក ត្រឡប់ទៅវិញនោះទេ។

ការគំរាមកំហែងម្តងហើយម្តងទៀតរបស់ប្រធានាធិបតីអាមេរិកលោក ដូណាល់ ត្រាំ (Donald Trump) ក្នុងការ «ដក»ការគ្រប់គ្រងព្រែកជីកប៉ាណាម៉ា ពីអ្វីដែលលោកហៅថា ឥទ្ធិពលចិនលើសលប់ បានបង្កឲ្យ មានការព្រួយបារម្ភ នៅក្នុងប្រទេសអាមេរិកកណ្តាលនេះ។

កិច្ចព្រមព្រៀងដែលបានចុះហត្ថលេខាដោយរដ្ឋមន្ត្រីការពារជាតិរបស់លោក ត្រាំ គឺ លោក Pete Hegseth និងរដ្ឋបាលរបស់លោកប្រធានាធិបតី Jose Raul Mulino អនុញ្ញាតឲ្យបុគ្គលិកយោធាអាមេរិកដាក់ពង្រាយទៅកាន់មូលដ្ឋាន ដែលគ្រប់គ្រងដោយប៉ាណាម៉ា នៅតាមបណ្ដោយព្រែកនេះ សម្រាប់ការហ្វឹកហាត់ សមយុទ្ធ និង «សកម្មភាពផ្សេងទៀត»។

លោក Kevin Cabrera ដែលជាឯកអគ្គរដ្ឋទូតរបស់លោក ត្រាំ បានប្រាប់សន្និសីទសារព័ត៌មានថា៖«គ្មានកន្លែងណាមួយ »ដែលកិច្ចព្រមព្រៀងនេះ និយាយអំពីការបើកមូលដ្ឋានយោធានោះទេ» ។

លោក បានបន្ថែមថា កិច្ចព្រមព្រៀងនេះ «នឹងពង្រឹងកិច្ចសហប្រតិបត្តិការរបស់យើងប្រឆាំងនឹងការជួញដូរគ្រឿងញៀន និងការពារព្រែកជីក» ដែលសហរដ្ឋអាមេរិកបានសាងសង់ និងគ្រប់គ្រង រហូតដល់ឆ្នាំ   ១៩៩៩។

កិច្ចព្រមព្រៀងនាពេលថ្មីៗនេះ បានបង្កឲ្យមានការតវ៉ាពីប្រជាជនប៉ាណាម៉ា ដែលប្រឆាំងនឹងការរំលោភលើអធិបតេយ្យភាពរបស់ប្រទេសរបស់ពួកគេ បន្ទាប់ពីការលុកលុយរបស់សហរដ្ឋអាមេរិក ក្នុងឆ្នាំ ១៩៨៩ ដើម្បីទម្លាក់លោកឧត្តមសេនីយ៍ Manuel Noriega ដែលជាមេដឹកនាំនៅពេលនោះ ពីអំណាច។