មេដឹកនាំនៃប្រទេសចិន និងរុស្ស៊ីកាលពីថ្ងៃព្រហស្បតិ៍ បានជំរុញសហគមន៍អន្តរជាតិឲ្យបោះបង់ការដាក់ទណ្ឌកម្ម និងសម្ពាធយោធាលើប្រទេសកូរ៉េខាងជើង ហើយបានអំពាវនាវឲ្យដោះស្រាយបញ្ហាពាក់ព័ន្ធតាមរយៈមធ្យោបាយការទូត។ នេះបើយោងតាមរបាយការណ៍របស់ប្រព័ន្ធផ្សព្វផ្សាយបរទេស។

ការអំពាវនាវនេះ ត្រូវបានធ្វើឡើងនៅក្នុងសេចក្តីថ្លែងការណ៍រួម ដែលចេញដោយប្រធានាធិបតីចិន លោក ស៊ី ជីនពីង ( Xi Jinping) និងប្រធានាធិបតីរុស្ស៊ីលោក វ្ល៉ាឌីមៀ ពូទីន ( Vladimir Putin) បន្ទាប់ពីកិច្ចប្រជុំរបស់ពួកគេ ដែលបានធ្វើឡើងនៅទីក្រុងមូស្គូ កាលពីព្រឹកថ្ងៃព្រហស្បតិ៍។

សេចក្តីថ្លែងការណ៍បានលើកឡើងថា៖«ភាគីទាំងពីរតស៊ូមតិសម្រាប់ការលើកកម្ពស់ទូលំទូលាយនៃការដោះស្រាយដ៏ស្មុកស្មាញនៃបញ្ហាឧបទ្វីបកូរ៉េទាំងស្រុង តាមរយៈមធ្យោបាយនយោបាយ និងការទូត»។ នេះបើយោងតាមសារព័ត៌មាន Sputnik។

សារព័ត៌មាននេះ បានរាយការណ៍ថា ចិន និងរុស្ស៊ីក៏បានជំរុញឲ្យរដ្ឋរៀងៗខ្លួន បោះបង់ចោលនូវគោលនយោបាយនៃវិធានការគាបសង្កត់ជាឯកតោភាគី និងសម្ពាធយ៉ាងខ្លាំងក្លា លើសាធារណរដ្ឋប្រជាមានិតប្រជាធិបតេយ្យកូរ៉េ ក៏ដូចជាគោលនយោបាយយោធានៃតំបន់អាស៊ី-ឦសាន និងបង្កការប្រឈមមុខដាក់គ្នានៅទីនោះ ដើម្បីចាត់វិធានការជាក់ស្តែង ក្នុងគោលបំណងកាត់បន្ថយ និងលុបបំបាត់ការគំរាមកំហែងនៃឧប្បត្តិហេតុប្រដាប់អាវុធ និងជម្លោះយោធាទ្រង់ទ្រាយធំ នៅលើឧបទ្វីបកូរ៉េ។

សេចក្តីថ្លែងការណ៍កាលពីថ្ងៃព្រហស្បតិ៍ មានគោលបំណងពង្រឹងភាពជាដៃគូយុទ្ធសាស្ត្ររបស់ពួកគេបន្ថែមទៀត ដោយលោក ពូទីន បានប្រាប់អ្នកសារព័ត៌មានថា ទំនាក់ទំនងរវាងរុស្ស៊ីនិងចិន `បានឈានដល់កម្រិតខ្ពស់បំផុត ក្នុងប្រវត្តិសាស្ត្រ»។