អធិការបតីថ្មីរបស់អាល្លឺម៉ង់លោក Friedrich Merz បានពិភាក្សាអំពីសង្រ្គាមអ៊ុយក្រែន និងជម្លោះ ពាណិជ្ជកម្ម ជាមួយលោកប្រធានាធិបតីអាមេរិក ដូណាល់ ត្រាំ ( Donald Trump) កាលពីថ្ងៃព្រហស្បតិ៍ ហើយបាននិយាយថា សហរដ្ឋអាមេរិក នៅតែជាដៃគូ «មិនអាចខ្វះបាន» របស់ទីក្រុងប៊ែរឡាំង ដោយប្រើការហៅទូរស័ព្ទជាលើកដំបូងរបស់ពួកគេ ដើម្បីព្យាយាមព្យាបាលទំនាក់ទំនងដែលបែកបាក់ ឡើងវិញ។

ចាប់តាំងពីលោក ត្រាំ ត្រឡប់មកកាន់តំណែងសេតវិមានវិញ លោកបានធ្វើឲ្យអឺរ៉ុបមានការផ្លាស់                ប្តូរយ៉ាងខ្លាំង នៅក្នុងគោលនយោបាយសន្តិសុខ និងពាណិជ្ជកម្ម ខណៈដែលមន្ត្រីរដ្ឋបាលជាន់ខ្ពស់របស់លោក បានគាំទ្រយ៉ាងខ្លាំងដល់គណបក្ស AFD ស្តាំនិយមជ្រុលរបស់ប្រទេសអាល្លឺម៉ង់។

ទោះបីជាជាអ្នកឆ្លងអាត្លង់ទិកនិយមក៏ដោយ លោក Merz បានអំពាវនាវឲ្យអឺរ៉ុបកាន់តែឯករាជ្យពីសម្ព័ន្ធមិត្តណាតូជាប្រពៃណីរបស់ខ្លួន ហើយបាននិយាយបន្ទាប់ពីការឈ្នះការបោះឆ្នោតខែកុម្ភៈរបស់លោកថាលោកមិនមាន «ការបំភាន់» អំពីសំឡេងថ្មីពីទីក្រុងវ៉ាស៊ីនតោនទេ។

សេចក្តីថ្លែងការណ៍ពីទីក្រុងប៊ែរឡាំង បានបញ្ជាក់ថា នៅក្នុងសុន្ទរកថារបស់ពួកគេកាលពីថ្ងៃព្រហស្បតិ៍ លោក Merz ដែលជាអ្នកអភិរក្សនិយម «បានធានាដល់លោកប្រធានាធិបតីអាមេរិកថា រយៈពេល ៨០ឆ្នាំបន្ទាប់ពីការបញ្ចប់នៃសង្គ្រាមលោកលើកទី ២ សហរដ្ឋអាមេរិក នៅតែជាមិត្តនិងដៃគូដែលមិនអាចខ្វះបានរបស់អាល្លឺម៉ង់»។ 

សេចក្តីថ្លែងការណ៍ បានបន្ថែមថា៖«មេដឹកនាំទាំងពីរ បានយល់ព្រមលើការផ្លាស់ប្តូរទស្សនៈយ៉ាងជិតស្និទ្ធ និងបានប្រកាសអំពីដំណើរទស្សនកិច្ចទៅវិញទៅមក នៅសហរដ្ឋអាមេរិក និងអាល្លឺម៉ង់» ដោយពុំបានផ្តល់កាលបរិច្ឆេទទេ។