អនុរដ្ឋមន្ត្រីការបរទេស លោកស្រី Hua Chunying បាននិយាយនៅថ្ងៃសុក្រនេះ មួយថ្ងៃមុនពេលមន្ត្រីនៃភាគីទាំងពីរ ត្រូវបានកំណត់ទៅជួបនៅប្រទេសស្វ៊ីស ដើម្បីពិភាក្សាអំពីពន្ធគយ ដែលពួកគេបានដាក់គ្នាទៅវិញទៅមកថា ប្រទេសចិន មានទំនុកចិត្តយ៉ាងពេញលេញលើសមត្ថភាពរបស់ខ្លួន ក្នុងការគ្រប់គ្រងបញ្ហាពាណិជ្ជកម្មរបស់សហរដ្ឋអាមេរិក។ 

លោកស្រី Hua បានថ្លែងប្រាប់អ្នកយកព័ត៌មានមួយក្រុមនៅសាលាមធ្យមមួយ ក្នុងសង្កាត់ជនបទ នៅភាគនិរតីនៃប្រទេសចិនថា៖«យើងគ្មានការភ័យខ្លាចទេ» ដោយបន្ថែមថា គោលនយោបាយពាណិជ្ជកម្មរបស់រដ្ឋបាលសហរដ្ឋអាមេរិក មិនអាចទ្រទ្រង់បានយូរទេ។

កិច្ចពិភាក្សាចុងសប្តាហ៍ដែលមានការចូលរួមពីមន្ត្រីជាន់ខ្ពស់សេដ្ឋកិច្ច និងពាណិជ្ជកម្មរបស់អាមេរិក និងចិន ត្រូវបានគេមើលឃើញយ៉ាងទូលំទូលាយថា ជាជំហានដំបូងឆ្ពោះទៅរកការដោះស្រាយសង្រ្គាមពាណិជ្ជកម្ម ដែលបានរំខានដល់សេដ្ឋកិច្ចពិភពលោក។ លោកប្រធានាធិបតី ដូណាល់ ត្រាំ (Donald Trump) បាននិយាយកាលពីថ្ងៃព្រហស្បតិ៍ថា ពន្ធរបស់សហរដ្ឋអាមេរិកលើទីក្រុងប៉េកាំងចំនួន ១៤៥%ទំនងជានឹងធ្លាក់ចុះ។

លោកស្រី Hua បាននិយាយក្នុងអំឡុងពេលធ្វើដំណើរ ដែលរៀបចំដោយទីក្រុងប៉េកាំង ទៅកាន់ស្រុក Malipo ដើម្បីបង្ហាញពីកិច្ចខិតខំប្រឹងប្រែងរបស់ប្រទេសចិន ក្នុងការកសាងសេដ្ឋកិច្ចជនបទថា៖«យើងមានទំនុកចិត្តយ៉ាងពេញលេញ»។

«យើងមិនចង់បានសង្រ្គាមប្រភេទណាមួយ ជាមួយប្រទេសណាមួយទេ ប៉ុន្តែយើងត្រូវប្រឈមមុខនឹងការពិត។ ដូចដែលអ្នកបានឃើញហើយ ប្រជាជនមានទំនុកចិត្តពេញលេញលើសមត្ថភាពរបស់យើង ក្នុងការជម្នះរាល់ការលំបាកទាំងអស់»។

ពន្ធគយរបស់លោក ត្រាំ លើដៃគូពាណិជ្ជកម្មជាច្រើនរបស់សហរដ្ឋអាមេរិក រួមទាំងប្រទេសចិន កំពុងតែមានទម្ងន់កាន់តែខ្លាំង ទៅលើសេដ្ឋកិច្ចពិភពលោក ដែលអស់រយៈពេលជាច្រើនទសវត្សរ៍ បានទទួលផលប្រយោជន៍ពីពាណិជ្ជកម្មសេរី ដែលអាចព្យាករបាន។