ប្រព័ន្ធផ្សព្វផ្សាយរដ្ឋកូរ៉េខាងជើង បានឲ្យដឹងនៅថ្ងៃសុក្រនេះថា បេសកជនជាន់ខ្ពស់របស់រុស្ស៊ីប្រចាំនៅកូរ៉េខាងជើង បានថ្លែងសរសើរការដាក់ពង្រាយកងទ័ពរបស់ទីក្រុងព្យុងយ៉ាងថា ជាការបង្ហាញនៃភាពជាដៃគូរបស់ប្រទេសទាំងពីរ ក្នុងពិធីទទួលស្វាគមន៍ខួបលើកទី ៨០ នៃជ័យជម្នះសង្គ្រាមលោកលើកទី ២ របស់ទីក្រុងមូស្គូ លើពួកណាហ្ស៊ីនិយមអាល្លឺម៉ង់។  

ទីភ្នាក់ងារសារព័ត៌មានមជ្ឈិមកូរ៉េ (KCNA) បានរាយការណ៍ថា ឯកអគ្គរដ្ឋទូតរុស្ស៊ីលោក Alexandr Matsegora បានធ្វើការអត្ថាធិប្បាយ ក្នុងពិធីទទួលបដិសណ្ឋារកិច្ចរំលឹកខួបលើកទី ៨០នៃទិវាជ័យជម្នះ របស់ប្រទេសរុស្ស៊ី ដែលបានធ្វើឡើងកាលពីថ្ងៃព្រហស្បតិ៍ នៅសណ្ឋាគារមួយ ក្នុងទីក្រុងព្យុងយ៉ាង។

សារព័ត៌មាន KCNA បានដកស្រង់សម្តីលោក Matsegora ដែលបានថ្លែងសុន្ទរកថារបស់លោក នៅឯព្រឹត្តិការណ៍នោះថា៖«ប្រតិបត្តិការសម្រាប់ការរំដោះតំបន់ឃើស(Kursk) បានបង្ហាញឲ្យឃើញថា សហព័ន្ធរុស្ស៊ី និងសាធារណរដ្ឋប្រជាធិបតេយ្យប្រជាមានិតកូរ៉េ គឺជាដៃគូយុទ្ធសាស្ត្រគ្រប់ជ្រុងជ្រោយ និងជាសម្ព័ន្ធមិត្ត»។

ដោយរំលឹកដល់សារនាពេលថ្មីៗរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលថ្លែងអំណរគុណដល់មេដឹកនាំកូរ៉េខាងជើង លោក គីម ជុងអ៊ុន ចំពោះការដាក់ពង្រាយកងទ័ពទាំងនោះ លោកឯកអគ្គរដ្ឋទូតក៏បានបញ្ជាក់ផងដែរថា ទីក្រុង ភូមិ និងទីលានដែលរុស្ស៊ីដណ្តើមបានមកវិញ នឹងត្រូវដាក់ឈ្មោះតាម «វីរបុរសកូរ៉េខាងជើង» ហើយបូជនីយដ្ឋានសម្រាប់់គោរពវិញ្ញាណក្ខន្ធរបស់ពួកគេ នឹងត្រូវបានសាងសង់    ឡើង។

កាលពីខែមុន ទាំងរុស្ស៊ី និងកូរ៉េខាងជើង បានអះអាងជាផ្លូវការអំពីការដាក់ពង្រាយទាហានកូរ៉េខាងជើង ទៅកាន់សមរភូមិមុខឃើស( Kursk) របស់រុស្ស៊ី រយៈពេលប្រហែលកន្លះឆ្នាំ បន្ទាប់ពីទីភ្នាក់ងារចារកម្មរបស់កូរ៉េខាងត្បូង បានរាយការណ៍កាលពីខែតុលាថា ទាហានកូរ៉េខាងជើងប្រហែល ១២.000នាក់ ត្រូវបានបញ្ជូនទៅកាន់ប្រទេសរុស្ស៊ី ដើម្បីគាំទ្រសង្រ្គាមប្រឆាំងនឹងអ៊ុយក្រែន។