ប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA បានរាយការណ៍នៅថ្ងៃសុក្រ (០៩ ឧសភា) នេះថា ទីក្រុងព្យុងយ៉ាង បានធ្វើការសាកល្បងប្រព័ន្ធមីស៊ីលរយៈចម្ងាយមធ្យមចំនួនពីរ កាលពីថ្ងៃព្រហស្បតិ៍សប្ដាហ៍នេះ ជាមួយនឹងការនិម្មិតការវាយប្រហារនុយក្លេអ៊ែរលើកងកម្លាំងរបស់សហរដ្ឋអាមេរិក និងកូរ៉េខាងត្បូង ព្រមទាំងជាការប្រឆាំងទៅនឹងសមយុទ្ធយោធារួមគ្នារបស់សម្ព័ន្អមិត្តទាំងពីរនេះ។

KCNA និយាយថា ការសាកល្បង ដែលត្រួតពិនិត្យដោយមេដឹកនាំ លោក គីម ជុងអ៊ុន នេះបានមើលឃើញការសាកល្បងនៃប្រព័ន្ធរ៉ូកែតបាញ់ច្រើនគ្រាប់ទំហំ ៦០០មីលីម៉ែត្រ (MLRS) និងមីស៊ីលបាលីស្ទិករយៈចម្ងាយខ្លី (SRBM) ឈ្មោះថា Hwasong-11A ពីឆ្នេរភាគខាងកើត រយៈពេលមួយថ្ងៃបន្ទាប់ពីយោធាកូរ៉េខាងត្បូង បានរកឃើញ និងរាយការណ៍ពីការបាញ់បង្ហោះនោះក្នុងពេលវេលាជាក់ស្តែង។

ប្រព័ន្ធផ្សព្វផ្សាយរដ្ឋបន្តថា ការធ្វើតេស្តនេះបានកំណត់គោលដៅលើទីតាំង "សត្រូវ" ផ្សេងៗ ហើយមានគោលបំណងធ្វើឱ្យអង្គភាពមីស៊ីលនុយក្លេអ៊ែរស្គាល់ច្បាស់ជាមួយនឹង "ប្រព័ន្ធគ្រប់គ្រងរួមបញ្ចូលគ្នានៃអាវុធនុយក្លេអ៊ែរជាតិ"។ KCNA បន្ថែមថា នេះរួមបញ្ចូលការបណ្តុះបណ្តាលស្តីពីភាពជឿជាក់នៃប្រតិបត្តិការប្រព័ន្ធ 'បាញ់នុយក្លេអ៊ែរ' ដែលសំដៅលើបញ្ជាការ និងយន្តការគ្រប់គ្រងនុយក្លេអ៊ែររបស់ប្រទេស ដែលត្រូវលើកឡើងលើកដំបូងក្នុងរបាយការណ៍ខែមីនា ឆ្នាំ២០២៣ ស្តីពីក្បាលគ្រាប់យុទ្ធសាស្ត្រថ្មី។

កម្មវិធីមីស៊ីលបាលីស្ទិករបស់កូរ៉េខាងជើង ដែលមានអាវុធនុយក្លេអ៊ែរ ត្រូវបានហាមឃាត់ដោយសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ ទីក្រុងព្យុងយ៉ាង បានឆ្ពោះទៅមុខក្នុងការអភិវឌ្ឍមីស៊ីលគ្រប់រយៈចម្ងាយ៕