ចិន និងសហរដ្ឋអាមេរិកត្រៀមចូលរួមកិច្ចប្រជុំពាណិជ្ជកម្មនៅចុងសប្តាហ៍នេះ ក្នុងទីក្រុងហ្សឺណែវ ប្រទេសស្វីស ហើយលោកប្រធានាធិបតី Donald Trump បានលើកឡើងពីក្តីសង្ឃឹមសម្រាប់កិច្ចព្រមព្រៀង ដើម្បីកាត់បន្ថយការដំឡើងពន្ធខ្ពស់កប់ពពករបស់អាមេរិកលើទំនិញចិន ។

លោក Trumpបាននិយាយកាលពីថ្ងៃព្រហស្បតិ៍ថា អ្នកមិនអាចទទួលយកការកើនឡើងកម្រិតពន្ធខ្ពស់ជាងនេះនោះទេ ។ វាមានកម្រិត ១៤៥ភាគរយទៅហើយ ដូច្នេះពួកយើងដឹងថា វានឹងត្រូវធ្លាក់ចុះ ។ លោកថា ជំនួបនៅចុងសប្តាហ៍នេះ នឹងមានសារៈសំខាន់ខ្លាំង ហើយលោកមានទំនុកចិត្តថា ចិនចង់បង្កើតកិច្ចព្រមព្រៀង ។

សេចក្តីអត្ថាធិប្បាយរបស់លោក Trump ធ្វើឡើងនៅសេតវិមាន ខណៈការប្រកាសកិច្ចព្រមព្រៀងពាណិជ្ជកម្មថ្មីរវាងអាមេរិក និងចក្រភពអង់គ្លេស ដែលតំណាងឲ្យសញ្ញាចុងក្រោយបំផុតនៃការបន្ទន់ជំហររវាងប្រទេសសេដ្ឋកិច្ចធំបំផុតទាំងពីររបស់ពិភពលោក ដែលកំពុងជាប់គាំងក្នុងការប្រឈមមុខដាក់គ្នាលើពន្ធ និងពាណិជ្ជកម្ម ។ 

គួរឲ្យដឹងថា នៅក្នុងសប្តាហ៍នេះ អាមេរិក និងចិន បានប្រកាសថា ពួកគេនឹងបញ្ជូនក្រុមមន្ត្រីជាន់ខ្ពស់របស់ខ្លួនទៅកាន់ប្រទេសស្វីស សម្រាប់កិច្ចពិភាក្សានៅថ្ងៃសៅរ៍ស្អែកនេះ។

ការដំឡើងពន្ធរបស់លោក Trump បង្កឲ្យមានការសងសឹកគ្នាទៅវិញទៅមកជាមួយទីក្រុងប៉េកាំង ដែលបានដំឡើងពន្ធដល់កម្រិត ១២៥ភាគរយលើទំនិញសហរដ្ឋអាមេរិក ។ ប៉ុន្តែតួលេខចេញនៅថ្ងៃសុក្រនេះ បង្ហាញផលប៉ះពាល់តិតតួចប៉ុណ្ណោះលើពាណិជ្ជកម្មរបស់ចិន ។

ការនាំចេញរបស់ចិន ហក់ឡើងខ្ពស់ជាង ៨ភាគរយនៅក្នុងខែមេសា ឬច្រើនជាង ៤ដងនៃចំនួន ព្យាករដោយក្រុមអ្នកវិភាគ ។

ថ្លែងនៅថ្ងៃតែមួយនេះ អនុរដ្ឋមន្រ្តីក្រសួងការបរទេសចិនលោកស្រី Hua Chunyingនិយាយថា ចិនគ្មានការព្រួយបារម្ភនោះទេចំពោះសមត្ថភាពរបស់ខ្លួនក្នុងការគ្រប់គ្រងភាពចលាចលពាណិជ្ជកម្ម ។

លោកស្រីបន្តថា គោលនយោបាយរបស់សហរដ្ឋអាមេរិក ពុំត្រូវបានទ្រទ្រង់នោះទេ ក្នុងនោះពលរដ្ឋសាមញ្ញរបស់អាមេរិក បានរងគ្រោះរួចទៅហើយដោយសារផលប៉ះពាល់ពីការដំឡើងពន្ធ ៕