ក្រុមអ្នកភូមិរស់នៅខេត្ត Punjab របស់ប៉ាគីស្ថាន ស្ថិតនៅជាប់ព្រំដែនជាមួយឥណ្ឌា និយាយថា ពួកគេបានផ្លាស់ទីកន្លែងរស់នៅរបស់ស្រ្តី ក្មេងៗ និងមនុស្សចាស់ ទៅកាន់តំបន់មានសុវត្ថិភាពជាងមុន ស្របពេលអរិភាពកើនឡើងជាមួយទីក្រុងញូវដែល្លី ។

អ្នកបន្តរស់នៅដែលភាគច្រើនគឺជាមនុស្សប្រុស និយាយថា ពួកគេមិនអាចទុកចោលគោក្របី និងដំណាំរបស់ពួកគេបានឡើយ ។

លោក Mohammad Arif គឺជាអ្នកស្រុកម្នាក់រស់នៅក្នុងភូមិ Bhanu Chak និយាយថា គ្មានអ្វីត្រូវខ្លាចនោះទេ ពួកយើងក្រោកឈរជាមួយកងកម្លំាងប្រដាប់អាវុធរបស់ពួកយើង ហើយនិងតាមបំណងរបស់ព្រះ ពួកយើងត្រូវតែឈរខាងកងទ័ពរបស់ពួកយើង ។

លោកបន្តថា កូនៗរបស់ពួកយើងបានចាកចេញទៅអស់ហើយ ។ ពួកយើងបានផ្លាស់ទីលំនៅកូនតូចៗចេញពីទីនេះ ទៅកាន់ទីកន្លែងមានសុវត្ថិភាពជាងមុន ប៉ុន្តែពួកយើងជាមនុស្សប្រុសបន្តស្នាក់នៅទីនេះ ។ ពួកយើងផ្លាស់ទីកន្លែងស្នាក់នៅរបស់មនុស្សចាស់ទៅកាន់កន្លែងសុវត្ថិភាពផងដែរ ។ បងប្អូនរបស់ពួកយើងនៅទីនេះ នៅក្នុងភូមិនេះ ពួកយើងមិនទៅណានោះទេ ។

ក្តីបារម្ភកើនឡើងចំពោះការឡើងកម្តៅអំពើហិង្សា ក្រោយកាលពីថ្ងៃពុធ ឥណ្ឌា បានវាយប្រហារអ្វីដែលពួកគេចាត់ទុកថាជាហេដ្ឋារចនាសម្ព័ន្ធក្រុមភេរវកម្ម នៅក្នុងប្រទេសប៉ាគីស្ថាន និងតំបន់កាស្មៀរគ្រប់គ្រងដោយប៉ាគីស្ថាន ជាការឆ្លើយតបនឹងការវាយប្រហារលើតំបន់កាស្មៀររបស់ឥណ្ឌាកាលពីថ្ងៃទី ២២ ខែមេសាកន្លងទៅ ដោយបានសម្លាប់ភ្ញៀវទេសចរ ២៦នាក់ ៕