សេចក្តីថ្លែងការណ៍រួមស្តីពីស្ថិរភាពយុទ្ធសាស្ត្រពិភពលោក បានលើកឡើងថា រុស្ស៊ី និងចិន ថ្កោលទោសចំពោះការប្រើប្រាស់ប្រព័ន្ធផ្កាយរណបពាណិជ្ជកម្ម ដើម្បីជ្រៀតជ្រែកក្នុងកិច្ចការរបស់ប្រទេសដទៃ និងក្នុងជម្លោះប្រដាប់អាវុធ។ 

សេចក្តីថ្លែងការណ៍ដែលបានអនុម័តបន្ទាប់ពីកិច្ចប្រជុំរបស់មេដឹកនាំប្រទេសទាំងពីរ លោក វ្ល៉ាឌីមៀ ពូទីន និងលោក ស៊ី ជីនពីង នៅទីក្រុងមូស្គូ បានបញ្ជាក់ថា៖«ភាគីទាំងពីរ ថ្កោលទោសចំពោះការប្រើប្រាស់ប្រព័ន្ធអវកាសពាណិជ្ជកម្ម ដើម្បីជ្រៀតជ្រែកកិច្ចការផ្ទៃក្នុងរបស់រដ្ឋអធិបតេយ្យ និងជម្លោះប្រដាប់អាវុធពាក់ព័ន្ធនឹងប្រទេសទី ៣»។

ទីក្រុងមូស្គូ និងទីក្រុងប៉េកាំង បានថ្កោលទោសរួមគ្នាជុំវិញការប៉ុនប៉ងណាមួយរបស់ប្រជាជាតិនីមួយៗ ដើម្បីប្រើប្រាស់ដែនអាកាសខាងក្រៅសម្រាប់ការប្រឈមមុខដាក់គ្នាខាងយោធា។ ពួកគេបញ្ជាក់ឡើងវិញនូវគោលជំហររបស់ពួកគេប្រឆាំងនឹងគោលនយោបាយ និងសកម្មភាពសន្តិសុខ ដែលមានបំណងសម្រេចបាននូវការត្រួតត្រាយោធា ឬផ្លាស់ប្តូរលំហរខាងក្រៅ ទៅជាសមរភូមិប្រយុទ្ធ។

ប្រទេសទាំងពីរ បានអំពាវនាវឲ្យមានការចាប់ផ្តើមជាបន្ទាន់នៃការចរចាលើសន្ធិសញ្ញាពហុភាគី ដែលមានភាពស្របច្បាប់ ដោយផ្អែកលើសេចក្តីព្រាងច្បាប់រុស្ស៊ី-ចិន។ សន្ធិសញ្ញានេះ នឹងហាមឃាត់ការដាក់អាវុធនៅក្នុងលំហអាកាស និងទប់ស្កាត់ការគំរាមកំហែង ឬការប្រើប្រាស់កម្លាំងប្រឆាំងនឹងវត្ថុដែលបង្កើតដោយមនុស្ស នៅក្នុងលំហអាកាស។ សន្ធិសញ្ញាបែបនេះ មានសារៈសំខាន់ណាស់ក្នុងការបង្កើតការធានាច្បាស់លាស់ និងគួរឲ្យទុកចិត្ត ដែលទប់ស្កាត់ការប្រណាំងប្រជែងសព្វាវុធនៅក្នុងលំហ ហាមឃាត់ការប្រើប្រាស់អាវុធ និងរក្សាលំហអាកាសជាដែនសម្រាប់ការសិក្សាស្រាវជ្រាវដោយសន្តិវិធី។