យោធាប៉ាគីស្ថាន កាលពីថ្ងៃព្រហស្បតិ៍ (ទី៨ ខែឧសភា) បានចោទប្រកាន់ប្រទេសឥណ្ឌាពីបទ «ប្រតិដ្ឋរឿងឡើង» បន្ទាប់ពីមានការចោទប្រកាន់ថា ប៉ាគីស្ថាន បានបើកការវាយប្រហារ ដោយយានដ្រូន និងមីស៊ីលលើប៉ុស្តិ៍យោធា នៅទូទាំងតំបន់កាស្មៀរដែលគ្រប់គ្រងដោយឥណ្ឌា។

ប៉ាគីស្ថានបានបដិសេធថា ខ្លួនមិនបានបើកការវាយប្រហារណាមួយលើឥណ្ឌានោះទេ កាលពីថ្ងៃព្រហស្បតិ៍ ដោយអ្នកនាំពាក្យយោធាជាន់ខ្ពស់ បានហៅការវាយប្រហារយានដ្រូនរបស់ឥណ្ឌាថា ជា «ការការពារខ្មោច»។

អ្នកនាំពាក្យយោធាប៉ាគីស្ថាន លោក Ahmed Sharif Chaudhry បាននិយាយថា៖ «ឥណ្ឌាបានបង្កើតការឃោសនាបំផ្លើស តាំងពីម្សិលមិញ (ថ្ងៃព្រហស្បតិ៍) អំពីការវាយប្រហាររបស់ប៉ាគីស្ថានលើទីតាំងចំនួន ១៥កន្លែង»។

លោកបានបន្ថែមថា៖ «វាជារឿងដ៏ចម្លែក និងប្រតិដ្ឋឡើង។ ខ្ញុំនឹងសួរសំណួរ ២-៣ អំពីរឿងនេះ។ សំណួរទី១ គឺពាក់ព័ន្ធនឹងរដ្ឋាភិបាលឥណ្ឌា និងកងកម្លាំងប្រដាប់អាវុធរបស់ពួកគេ តើពួកគេរស់នៅក្នុងសតវត្សរ៍ទី១៨ ឬសតវត្សរ៍ទី២១ មែនទេ? ពីព្រោះនៅក្នុងសតវត្សរ៍ទី២១ រាល់គ្រាប់ផ្លោងទាំងអស់ បានបន្សល់ទុកនូវដានឌីជីថល និងហត្ថលេខា»។ យោងតាមសារព័ត៌មានប៉ាគីស្ថាន Dawn អ្នកនាំពាក្យយោធារូបនេះបានបង្ហាញរូបភាពនៃបំណែកយានដ្រូន អំឡុងសន្និសីទសារព័ត៌មាន។ លោកបានបញ្ជាក់ថា កម្ទេចកម្ទី និងយានដ្រូនដែលត្រូវបានបាញ់ធ្លាក់ កំពុងត្រូវបានប្រមូលពីទីតាំងជាច្រើន។

គួរបញ្ជាក់ថា យ៉ាងហោចណាស់មនុស្ស ៤៨នាក់ ត្រូវបានសម្លាប់នៅសងខាងព្រំដែននៃប្រទេសទាំង២ ចាប់តាំងពីឥណ្ឌាបានបើកការវាយប្រហារតាមអាកាសកាលពីថ្ងៃពុធ ដែលខ្លួនបាននិយាយថា បានកំណត់គោលដៅលើ «ជំរុំភេរវករ» ដែលបង្កឲ្យមានអំពើហិង្សាដ៏អាក្រក់បំផុត ក្នុងរយៈពេលជាច្រើនទសវត្សរ៍ រវាងប្រទេសជិតខាងអាស៊ីខាងត្បូង។ ភាគច្រើននៃអ្នកស្លាប់ និងរបួស គឺនៅប៉ាគីស្ថាន ជាកន្លែងដែលអាជ្ញាធរបានប្រាប់ថា យ៉ាងហោចណាស់មនុស្ស ៣២នាក់ បានបាត់បង់ជីវិត ក្នុងនោះមានកុមារ ១២នាក់ផងដែរ៕