រដ្ឋមន្ត្រីក្រសួងពាណិជ្ជកម្ម លោក Howard Lutnick បាននិយាយថា ការចរចាពាណិជ្ជកម្មជាមួយប្រទេសកូរ៉េខាងត្បូង និងជប៉ុន ដើម្បីឈានដល់ការបញ្ចប់សព្វគ្រប់ អាចចំណាយពេលច្រើនជាងកិច្ចព្រមព្រៀងក្របខ័ណ្ឌដែលប្រធានាធិបតី លោក Donald Trump បានប្រកាសកាលពីថ្ងៃព្រហស្បតិ៍ (ទី៨ ខែឧសភា) ជាមួយចក្រភពអង់គ្លេស ជាសញ្ញាដែលបង្ហាញថា ដៃគូអាស៊ីមួយចំនួន ប្រហែលជាត្រូវរង់ចាំ សម្រាប់ការបន្ធូរបន្ថយអត្រាពន្ធ។

នៅក្នុងបទសម្ភាសន៍ជាមួយទូរទស្សន៍ Bloomberg លោក Lutnick បាននិយាយថា៖ «យើងត្រូវចំណាយពេលវេលាច្រើនជាមួយប្រទេសជប៉ុន និងកូរ៉េខាងត្បូង»។ ជាមួយគ្នានេះ លោកបានបន្ថែមថា ឥណ្ឌាបាននិងកំពុង «មានទំនាក់ទំនងយ៉ាងសកម្ម» ហើយប្រទេសនេះ គឺ «ប្រាកដណាស់» មានលទ្ធភាពស្ថិតក្នុងចំណោមប្រទេសបន្ទាប់ ដែលនឹងឈានដល់កិច្ចព្រមព្រៀង។

ក្នុងពេលជាមួយគ្នានោះ លោក Lutnick បាននិយាយថា លោកសង្ឃឹមថា កិច្ចព្រមព្រៀងដំបូង អាចធ្វើជាគំរូ សម្រាប់តំបន់ផ្សេងៗ ដោយជួយបង្ហាញពីប្រភេទសម្បទានដែលលោក Trump កំពុងស្វែងរកជាថ្នូរនឹងការបន្ធូរបន្ថយពន្ធ។

ប្រមុខផ្នែកពាណិជ្ជកម្មដែលបានដើរតួនាទីនាំមុខ ក្នុងការចរចាពាណិជ្ជកម្ម បាននិយាយថា ពន្ធមូលដ្ឋាន ១០ភាគរយរបស់លោក Trump នៅតែជា «បន្ទាត់ខាងក្រោម» ប៉ុន្តែប្រទេសជាច្រើន នឹងមានអត្រាខ្ពស់ជាងនេះ ប្រសិនបើពួកគេមិនចាត់វិធានការយ៉ាងសកម្ម ដើម្បីបើកចំហសេដ្ឋកិច្ចរបស់ពួកគេទេ៕