សភាតំណាងរាស្រ្តអាមេរិកដែលគ្រប់គ្រងដោយបក្សសាធារណរដ្ឋ កាលពីថ្ងៃព្រហស្បតិ៍ (ទី៨ ខែឧសភា) បានអនុម័តសេចក្ដីស្នើច្បាប់ ដើម្បីប្តូរឈ្មោះឈូងសមុទ្រម៉ិកស៊ិក (Gulf of Mexico) ជាផ្លូវការទៅជាឈូងសមុទ្រអាមេរិក (Gulf of America) បន្ទាប់ពីមានក្រឹត្យរបស់ប្រធានាធិបតី លោក Donald Trump តែចំណាត់ការនេះ ទំនងជាមិនជោគជ័យនៅព្រឹទ្ធសភានោះឡើយ។

សភាបានបោះឆ្នោត ២១១ ទល់នឹង ២០៦សំឡេង ដើម្បីផ្លាស់ប្តូរឈ្មោះដែនទឹកដែលមានព្រំប្រទល់ជាប់រដ្ឋចំនួន ៥ នៅភាគអាគ្នេយ៍សហរដ្ឋអាមេរិក និងជាតំបន់ដ៏ធំមួយរបស់ម៉ិកស៊ិក ហើយហូរចូលទៅក្នុងមហាសមុទ្រអាត្លង់ទិក និងសមុទ្រការ៉ាអ៊ីព។

ការបញ្ចូលឈ្មោះឈូងសមុទ្រអាមេរិក ប្រសិនបើព្រឹទ្ធសភា បានអនុម័តដែរនោះ នឹងធ្វើឲ្យកាន់តែមានការលំបាកបន្ថែមទៀត ដើម្បីឲ្យប្រធានាធិបតីនាពេលអនាគតកែប្រែក្រឹត្យរបស់លោក Trump។

គណបក្សសាធារណរដ្ឋ គ្រប់គ្រងសំឡេងភាគច្រើន ៥៣ ទល់នឹង ៤៧ នៅព្រឹទ្ធសភា ដែលជាធម្មតាវាត្រូវការសំឡេងភាគច្រើនយ៉ាងតិច ៦០សំឡេង ដើម្បីជំរុញច្បាប់នេះ។ សេចក្ដីស្នើច្បាប់របស់សភា ត្រូវបានណែនាំដោយតំណាងរាស្ត្រមកពីគណបក្សសាធារណរដ្ឋ គឺលោកស្រី Marjorie Taylor Greene ដែលជាអ្នកគាំទ្រលោក Trump យ៉ាងខ្លាំងក្លា។

ដែនទឹកនេះត្រូវបានគេហៅឈ្មោះឈូងសមុទ្រម៉ិកស៊ិកអស់រយៈពេលជាង ៤០០ឆ្នាំមកហើយ ហើយត្រូវបានគេទទួលស្គាល់ជាអន្តរជាតិ។ តែទោះជាយ៉ាងណាក្ដី ប្រធានាធិបតីសហរដ្ឋអាមេរិកមានសិទ្ធិអំណាច ក្នុងការប្រកាសឈ្មោះភូមិសាស្ត្រ ដែលអនុវត្តនៅក្នុងការប្រើប្រាស់របស់រដ្ឋាភិបាលសហព័ន្ធ៕