យោងតាមអាជ្ញាធរក្នុងតំបន់បានឲ្យដឹងថា ឆាកមួយបានដួលរលំនៅឯកន្លែងប្រគុំតន្ត្រីហាលវាល ក្នុងទីក្រុង Mexico ប្រទេសម៉ិកស៊ិក កាលពីរសៀលថ្ងៃព្រហស្បតិ៍ (ទី៨ ខែឧសភា) ដោយបានបណ្ដាលឲ្យមនុស្ស ៧នាក់រងរបួស។

លេខាធិការដ្ឋានគ្រប់គ្រងហានិភ័យ និងកិច្ចការពារស៊ីវិលរបស់ទីក្រុងនេះ បានឲ្យដឹងថា ឧបទ្ទវហេតុនេះបានកើតឡើងនៅពេលដែលមានខ្យល់បក់ខ្លាំង ដោយបានបណ្តាលឲ្យរចនាសម្ព័ន្ធដែកធ្វើឆាកដួលរលំ។

លេខាធិការដ្ឋាន បានឲ្យដឹងនៅក្នុងសេចក្តីថ្លែងការណ៍ថា ក្រុមឆ្លើយតបសង្គ្រោះបន្ទាន់ បានផ្តល់ការព្យាបាលភ្លាមៗនៅនឹងកន្លែង ហើយមនុស្ស ២នាក់ ត្រូវបានបញ្ជូនទៅមន្ទីរពេទ្យ ដើម្បីទទួលការព្យាបាលបន្ថែម។ ឆាកតន្ត្រីនេះត្រូវបានរៀបចំឡើង សម្រាប់កម្មវិធីប្រគុំតន្ត្រីមួយដែលភ្ជាប់នឹងការប្រារព្ធទិវាមាតា៕