អ៊ីស្រាអែល បានធ្វើការវាយលុកផ្លូវអាកាសយ៉ាងខ្លាំង នៅភាគខាងត្បូងប្រទេសលីបង់ កាលពីថ្ងៃព្រហស្បតិ៍ ដោយបានវាយប្រហារគោលដៅភាគខាងជើងនៃទន្លេ Litani ដោយបំពានបទឈប់បាញ់ដែលសម្របសម្រួលដោយអាមេរិក។

បន្ទាប់ពីការវាយប្រហារនៅតំបន់ Nabatieh ប្រធានាធិបតីលីបង់លោក Joseph Aoun បានជួបពិភាក្សាជាបន្ទាន់ ជាមួយទំនាក់ទំនងបរទេសកម្រិតខ្ពស់ ដើម្បីបញ្ឈប់ការរំលោភបំពានរបស់អ៊ីស្រាអែល។

ការវាយប្រហារតាមអាកាសនេះ បានបណ្តាលឲ្យមនុស្សម្នាក់ស្លាប់ ដែលតាមសេចក្តីរាយការណ៍ គឺ មេដឹកនាំយោធាជាន់ខ្ពស់របស់ក្រុមហេសបូឡា និងនាំឲ្យឲ្យមានរបួសជាច្រើននាក់ បង្កការភ័យស្លន់ស្លោ នៅក្នុងសាលារៀន សាកលវិទ្យាល័យ និងក្នុងចំណោមអ្នកស្រុក។

លោក Aoun បានតាមដានការវិវឌ្ឍផ្នែកសន្តិសុខជាមួយប្រមុខកងទ័ពលោក ឧត្តមសេនីយ៍ Rodolphe Haikal ដោយទទួលបានរបាយការណ៍អំពីតំបន់ ដែលត្រូវបានវាយប្រហារដោយការទម្លាក់គ្រាប់បែករបស់អ៊ីស្រាអែល។

ក្រសួងសុខាភិបាល បាននិយាយថា ចំនួនអ្នកស្លាប់ដំបូងនៃការវាយប្រហារតាមអាកាសរបស់អ៊ីស្រាអែលនៅជាយក្រុង Nabatieh មានម្នាក់ ដោយ ៨នាក់ បានរងរបួស។