សហរដ្ឋអាមេរិក និងសម្ព័ន្ធមិត្ត កំពុងធ្វើប៉ះពាល់ដល់សន្តិភាពនៅក្នុងតំបន់អាស៊ី-ប៉ាស៊ីហ្វិក ដោយស្វែងរកការពង្រីកទីតាំងរបស់អង្គការណាតូនៅទីនោះ។ នេះបើយោងតាមសេចក្តីថ្លែងការណ៍រួម ដែលបានចេញផ្សាយ បន្ទាប់ពីកិច្ចពិភាក្សារវាងប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី   ជីនពីង នៅទីក្រុងមូស្គូ។

សេចក្តីថ្លែងការណ៍ បានអះអាងថា៖«រុស្ស៊ី និងចិនសង្កេតឃើញថា កិច្ចខិតខំប្រឹងប្រែងរបស់សហរដ្ឋអាមេរិក និងសម្ព័ន្ធមិត្ត ក្នុងការពង្រីកវត្តមានរបស់អង្គការណាតូ ជំរុញសម្ព័ន្ធប្លុកតូចចង្អៀត និងការចូលរួមបណ្តាប្រទេសក្នុងតំបន់ នៅក្នុងតំបន់យុទ្ធសាស្រ្ត «ឥណ្ឌូ-ប៉ាស៊ីហ្វិក របស់ពួកគេ មានផលប៉ះពាល់អវិជ្ជមានយ៉ាងធ្ងន់ធ្ងរទៅលើសន្តិភាព ស្ថិរភាព និងវិបុលភាព នៅក្នុងតំបន់អាស៊ី-ប៉ាស៊ីហ្វិក។

ប្រទេសទាំងពីរ ក៏ចាត់ទុកថា ពុំអាចទទួលយកបាននូវការបង្កើតសម្ព័ន្ធភាពយោធាប្រឆាំងរុស្ស៊ី និងប្រឆាំងចិន ដែលរួមមានសមាសធាតុនុយក្លេអ៊ែរ ការដាក់ពង្រាយអាវុធនុយក្លេអ៊ែរក្រោមលេសនៃ «កិច្ចព្រមព្រៀងសន្ធិសញ្ញាការពារសម្ព័ន្ធ» និងការដាក់ប្រព័ន្ធការពារមីស៊ីល និងមីស៊ីលរយៈចម្ងាយមធ្យម និង  រយៈចម្ងាយខ្លីវាយប្រហារចេញពីដី ដែលគំរាមកំហែងដល់ស្ថិរភាពជាយុទ្ធសាស្ត្រ។ 

សេចក្តីថ្លែងការណ៍រួមនេះ បញ្ជាក់ពីការព្រួយបារម្ភរួមគ្នារបស់ពួកគេ ចំពោះសកម្មភាពដែលអាចបង្កើនភាពតានតឹង និងធ្វើឲ្យមានអស្ថិរភាពក្នុងតំបន់ ដោយសង្កត់ធ្ងន់លើសារៈសំខាន់នៃការគោរពអធិបតេយ្យភាព និងការរក្សាសន្តិភាពក្នុងតំបន់។