ប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងពីសារៈសំខាន់ជាថ្មី និងភាពពាក់ព័ន្ធរបស់អង្គការសហប្រជាជាតិ ចំពេលមានកិច្ចខិតខំប្រឹងប្រែងជាបន្តបន្ទាប់ ដើម្បីបង្កើតសណ្តាប់ធ្នាប់សាកលដែលមានសមធម៌ជាងមុន។ ថ្លែងក្នុងពិធីជប់លៀងដែលធ្វើឡើងក្នុងនាមលោកទទួលភ្ញៀវ ដែលបានអញ្ជើញចូលរួមអបអរសាទរខួបលើកទី ៨០ នៃទិវាជ័យជម្នះ លោកបានថ្លែងថា៖«ថ្ងៃនេះ នៅពេលយើងឆ្ពោះទៅកាន់ពិភពលោកប្រកបដោយយុត្តិធម៌ តម្រូវការនិងសារៈសំខាន់របស់អង្គការសហប្រជាជាតិ គឺកើនឡើងជាថ្មីម្តងទៀត»។

លោកបានគូសបញ្ជាក់ពីភាពចាំបាច់នៃការពង្រឹងតួនាទីស្នូលរបស់UN ក្នុងកិច្ចការអន្តរជាតិ ដោយសង្កត់ធ្ងន់ថា៖«អង្គការនេះ មានសារៈសំខាន់ណាស់ក្នុងការពង្រឹងមុខងារសម្របសម្រួលដ៏ចំបាច់របស់ខ្លួន ដើម្បីគ្រប់គ្រងបញ្ហាសកលប្រកបដោយប្រសិទ្ធភាព និងធានាឲ្យមានការប្រកាន់ខ្ជាប់យ៉ាងម៉ឺងម៉ាត់ចំពោះបទដ្ឋាន និងគោលការណ៍ជាមូលដ្ឋាននៃច្បាប់អន្តរជាតិ ដែលមានចែងក្នុងធម្មនុញ្ញអង្គការសហប្រជាជាតិ ដោយប្រកាន់ខ្ជាប់នូវសុចរិតភាព ទំនាក់ទំនងគ្នាទៅវិញទៅមក និងគ្រប់ទិដ្ឋភាព។ 

លោកបានកត់សម្គាល់ថា ប្រធានបទនេះ គឺជាចំណុចមួយនៃការពិភាក្សា នៅក្នុងកិច្ចប្រជុំកំពូល BRICS កាលពីឆ្នាំមុន នៅទីក្រុង Kazan ប្រទេសរុស្ស៊ី ដែលជាព្រឹត្តិការណ៍មួយចូលរួមដោយមេដឹកនាំគណៈប្រតិភូដូចគ្នាជាច្រើន ដែលមានវត្តមាននៅក្នុងវិមានក្រឹមឡាំង នៅថ្ងៃនេះ។

លោក ពូទីន បានឆ្លុះបញ្ចាំងពីដំណើរឆ្ពោះទៅរកការបង្កើតក្របខណ្ឌថ្មីសម្រាប់សន្តិសុខពិភពលោក និងការបង្កើតអង្គការសហប្រជាជាតិ ដែលត្រូវបានផ្តួចផ្តើម នៅខែឧសភា ឆ្នាំ ១៩៤៥។ លោកបានសង្កត់ធ្ងន់ថា ៖«នេះ គឺជាកាតព្វកិច្ចរបស់យើងចំពោះជំនាន់នៃអ្នកឈ្នះ» ដើម្បីទាញយកសក្តានុពលដ៏ធំធេងនៃស្ថាប័ននេះ ឲ្យបានពេញលេញបំផុត»។