​បាល់ទាត់៖ ​ក្រុម​ជើងឯក​រង​ប្រាំ​សម័យ​ឥណ្ឌូនេស៊ី​រក​បាន​ជ័យជំនះ ២​ប្រកួត​ផ្ទួនៗ​ក្នុង​ព្រឹត្តិការណ៍​បាល់ទាត់​ជើងឯក​អាស៊ាន AFF Championship ក្រោយ​យកឈ្នះ​ឡាវ ៥-១​។ ​​បន្ទាប់ពី​យកឈ្នះ​កម្ពុជា​នៅ​ប្រកួត​ដំបូង ៤-២ ឥណ្ឌូនេស៊ី​បាន​នាំមុខ​ឡាវ ២-១ ក្នុង​វគ្គ​ទី១ ដោយ​គ្រាប់​បាល់​របស់ Asnawi Bahar និង Ifan Jaya ខណៈ​ឡាវ​រកបាន​មួយ​គ្រាប់​ដោយ Souvanny នៅ​នាទី​ទី៤១​។

​​វគ្គ​ទី២ ឥណ្ឌូនេស៊ី​មិន​បង្អង់​ដៃ​ឡើយ​ដោយ​រកបាន ៣គ្រាប់​បន្ថែមទៀត​ដោយ Witan Sulaeman នាទី​ទី៥៦, Ezra Walian នាទី​ទី៧៧ និង​គ្រាប់​ចុងក្រោយ​ដោយ​ប្រធាន​ក្រុម Evan Dimas នាទី​ទី៨៤​។ ​​គ្រូបង្វឹក​ឥណ្ឌូនេស៊ី​លោក Shin Tae-yong ឱ្យដឹង​ក្រោយ​ចប់​ការប្រកួត​ថា នេះ​ជា​លទ្ធផល​ដែល​ក្រុម​របស់លោក​រំពឹងទុកដើម្បី​ឱកាស​ទៅកាន់​វគ្គ​បន្ទាប់​។ ​​ចំណែក​គ្រូបង្វឹក​ឡាវ​លោក V.Selvaraj ថា ​ក្រុម​របស់លោក​បានដាក់​បញ្ចូល​កីឡាករ​ក្មេងៗ​ច្រើន ហើយ​លោក​រីករាយ​ដែល​ក្រុម​អាច​រកបាន​មួយ​គ្រាប់​ទល់នឹង​ឥណ្ឌូនេស៊ី​។ ​​ជ័យជំនះ​នេះ​ធ្វើឱ្យ​ឥណ្ឌូនេស៊ី​បាន​ឡើង​មកឈរ​លេខ ២ ក្នុង​ពូ​ល B នេះ​មាន ៦ពិន្ទុ​ពី​ការប្រកួត ២លើក ​ខណៈ​ឡាវ​អស់​ឱកាស​ទៅ​វគ្គ​បន្ត​ហើយ​ក្រោយ​ចាញ់ ៣ប្រកួត​ផ្ទួនៗ​៕

​អត្ថបទ​៖​នាង សុភា​វុ​ធ