ក្រុមអ្នកស្រុករស់នៅជិតខ្សែបន្ទាត់ព្រំដែនកំពុងប្រយុទ្ធប្រយុទ្ធគ្នា ក្នុងតំបន់កាស្មៀររបស់ប្រទេសឥណ្ឌា ត្រូវបានគេមើលឃើញធ្វើដំណើរចាកចេញតាមរថយន្តក្រុងនៅថ្ងៃសុក្រនេះ ពេលដែលពួកគេត្រូវបានណែនាំដោយក្រុមអាជ្ញាធរឲ្យជម្លៀសខ្លួនចេញពីភូមិរបស់ពួកគេ ខណៈការប៉ះទង្គិចគ្នារវាងប្រទេសជិតខាងប្រដាប់អាវុធនុយក្លេអ៊ែរទាំង ២ កើនឡើងកាន់តែខ្លាំង ។

នៅថ្ងៃសុក្រនេះ ឥណ្ឌា និងប៉ាគីស្ថាន បានចោទប្រកាន់គ្នាទៅវិញទៅមកពីការវាយប្រហារយោធាថ្មី ដោយប្រើប្រាស់យានដ្រូន និងកាំភ្លើងធំ សម្រាប់ថ្ងៃទី ៣នៃសង្រ្គាមដ៏អាក្រក់បំផុតក្នុងរយៈពេលជិត ៣ទសវត្សរ៍កន្លងមកនេះ ។

ប៉ាគីស្ថាន បានច្រានចោលថា ពួកគេពុំបានជាប់ពាក់ព័ន្ធនឹងការវាយប្រហារនេះឡើយ ប៉ុន្តែប្រទេសទាំងនេះត្រូវបានគេមើលឃើញផ្ទុះអាវុធដាក់គ្នាឆ្លងកាត់ព្រំដែន ហើយនិងការផ្លោងគ្រាប់កាំភ្លើង ការបញ្ជូនយានដ្រូន ចាប់តាំងពីពេលនោះមក ក្នុងនោះមនុស្សយ៉ាងច្រើន បានស្លាប់ដោយសារអំពើហិង្សាមួយនេះ ។

អ្នកស្រុកមួយរូបសុំមិនបញ្ចេញឈ្មោះរស់នៅក្នុងតំបន់កាស្មៀរ និយាយថា ស្ថានភាពពិតជាគ្រោះថ្នាក់ខ្លាំងណាស់នៅតំបន់ទាំងអស់នេះ មាននូវការផ្លោងគ្រាប់កាំភ្លើងយ៉ាងច្រើន ហើយការផ្លោងគ្រាប់កាំភ្លើងធំនេះ បានកើតឡើងអស់រយៈពេល ២-៣ថ្ងៃមកហើយ ។

លោកបន្តថា ពួកយើងបានរត់ភៀសខ្លួន និងធ្វើដំណើរមកដល់ស្រុក Uri ស្នាក់នៅក្នុងវិហារ ពួកយើងត្រូវតែសង្រ្គោះជីវិតកូនៗរបស់ពួកយើង និងជីវិតរបស់ខ្លួនពួកយើង ។ រថយន្តក្រុងទើបមកដល់ ហើយឥឡូវពួកយើងត្រូវចាកចេញទៅហើយ ៕