​ប៉ូឡូញ​៖ អធិការបតី​ថ្មី​របស់​ប្រទេស​អាល្លឺម៉ង់លោក Olaf Scholz បាន​ស្ថិតនៅ​ទីក្រុង Warsaw កាល​ពី​ថ្ងៃអាទិត្យដើម្បី​ពិភាក្សា​ជាមួយ​នាយករដ្ឋមន្ត្រី​ប៉ូឡូញលោក Mateusz Morawiecki អំពី​ការ​ធ្វើ​អន្តោ​ប្រវេ​ស​ន៍​ ថាមពល បញ្ហា​សហភាព​អឺរ៉ុប និង​ភាព​តានតឹង​នៅ​ភាគ​ខាងកើត​ព្រំដែន​របស់​ប្លុក​នេះ​។

​លោក Olaf Scholz ត្រូវ​បាន​ស្វាគមន៍​ដោយ​លោក Morawiecki ជាមួយ​នឹង​កង​កិត្តិយស​យោធានៅមុខ​ការិយាល័យ​នាយករដ្ឋមន្ត្រី​ប្រទេស​ប៉ូឡូញ​។ វា​គឺជា​ដំណើរ​ទស្សនកិច្ច​ដំបូង​របស់​លោក Scholz បន្ទាប់ពី​លោក​បាន​ស្បថ​ចូលកាន់​តំណែងជាមួយ​គណៈរដ្ឋមន្ត្រី​ចម្រុះ​របស់​លោក​កាលពី​ថ្ងៃ​ពុធ​។ ថ្លែង​នៅ​ក្នុង​សន្និសីទ​សារព័ត៌មាន​រួម លោក Scholz បាន​ព្រមាន​ប្រទេស​រុស្ស៊ី​ជុំវិញ​ការ​បង្កើន​យោធា របស់​ខ្លួន​ នៅ​ជិត​ព្រំដែន​ជាមួយ​ប្រទេស​អ៊ុយ​ក្រែ​ន។​ ​លោក Scholz បាន​រិះគន់​ប្រធានាធិបតី​​បេឡា​រុសលោក Aleksander Lukaschenko លើ​ការធ្វើ​អន្តោ​ប្រវេ​ស​ន៍ បន្ទាប់ពី​កើតឡើង​ភាព​តានតឹងនៅ​ព្រំដែន​​បេឡា​រុស​-​ប៉ូឡូញ​។

​ប៉ូឡូញ និង​សហភាព​អឺរ៉ុប​បាន​និយាយ​ថា រដ្ឋាភិបាល​របស់​លោក Lukashenko កំពុង​បង្កើត​អស្ថិរភាព​ក្នុង​ប្លុក​នេះ ដោយ​ការ​ជំរុញឱ្យ​មាន​ការ​ធ្វើ​អន្តោ​ប្រវេ​ស​ន៍។ រដ្ឋាភិបាល​នៅ​ទីក្រុង Warsaw ជាប់​ពាក់ព័ន្ធ​ក្នុង​ជម្លោះ​កាន់​តែ​ខ្លាំង​ជាមួយ​គណៈកម្មការ​អឺរ៉ុប ដែល​ជា​ស្ថាប័នប្រតិបត្តិរបស់​សហភាព​អឺរ៉ុប ដែល​កំពុង​ដកហូត​មូលនិធិ​សង្គ្រោះ​ជំងឺ​រាតត្បាត​ពី​ប្រទេស​ប៉ូឡូញ​។ លោក Scholz និងលោក Morawiecki បាន​ពិភាក្សា​អំពី​ទំនាក់ទំនង​ទ្វេភាគីដ៏​ស្មុគស្មាញ ក្រោម​រដ្ឋាភិបាល​ថ្មីរបស់​ប្រទេស​អាល្លឺម៉ង់​៕

អត្ថបទ៖ ប៊ុនថន