មូលនិធិកុមាររបស់អង្គការសហប្រជាជាតិ ឬអង្គការយូនីសេហ្វ (UNICEF) នៅថ្ងៃសុក្រ (ទី៩ ខែឧសភា) នេះ បានរិះគន់ផែនការដែលកំពុងលេចឡើង ក្នុងការគ្រប់គ្រងលើការចែកចាយជំនួយមនុស្សធម៌ នៅតំបន់ហ្កាហ្សា កាលពីថ្ងៃព្រហស្បតិ៍ ដែលស្នើឡើងដោយអ៊ីស្រាអែល និងសហរដ្ឋអាមេរិក ដោយនិយាយថា គម្រោងនេះនឹងបង្កើនទុក្ខវេទនាកាន់តែខ្លាំងឡើង សម្រាប់កុមារ និងក្រុមគ្រួសារ។

ក្រសួងការបរទេសសហរដ្ឋអាមេរិក នៅមុននេះ បានលើកឡើងថា ដំណោះស្រាយ ដែលនឹងអនុញ្ញាតឲ្យការផ្តល់ជំនួយស្បៀងអាហារទៅកាន់តំបន់ហ្កាហ្សា «ជិតកើតឡើងហើយ» ហើយការប្រកាសនឹងកើតមានក្នុងពេលឆាប់ៗនេះ។

សំណើមួយ កំពុងមាននៅក្នុងចំណោមសហគមន៍ជំនួយ សម្រាប់មូលនិធិមនុស្សធម៌ហ្កាហ្សា ដែលនឹងតម្រូវឲ្យចែកចាយអាហារពី «កន្លែងចែកចាយដ៏សុវត្ថិភាព» ចំនួន ៤កន្លែង ស្រដៀងនឹងផែនការដែលបានប្រកាសដោយអ៊ីស្រាអែលកាលពីដើមសប្តាហ៍នេះ ជាសំណើរដែលបាននាំឲ្យមានការរិះគន់ថា វានឹងធ្វើឲ្យមានការផ្លាស់ទីលំនៅអាក្រក់បំផុតប្រកបដោយប្រសិទ្ធភាព ក្នុងចំណោមអ្នកស្រុកហ្កាហ្សា។

អ្នកនាំពាក្យរបស់អង្គការយូនីសេហ្វ លោក James Elder បាននិយាយថា៖ «វាហាក់ដូចជាការបង្កើតឡើងនូវផែនការដែលបង្ហាញដោយអ៊ីស្រាអែលដល់សហគមន៍មនុស្សធម៌ នឹងបង្កើនការរងទុក្ខវេទនាជាបន្តបន្ទាប់ដល់កុមារ និងគ្រួសារ នៅក្នុងតំបន់ហ្កាហ្សាស្ទ្រីប»។

សហគមន៍ផ្តល់ជំនួយបានបដិសេធរួចហើយនូវផែនការណាមួយដែលនឹងផ្តល់ឲ្យអ៊ីស្រាអែលកាន់កាប់នូវតួនាទីក្នុងការចែកចាយជំនួយ នៅក្នុងតំបន់ហ្កាហ្សា៕