ជនប៉ាឡេស្ទីននៅទីក្រុង Jabaliaស្ថិតក្នុងតំបន់ហ្កាហ្សាស្រ្ទីប បាននិយាយរៀបរាប់ពីទុក្ខលំបាកជាទីបំផុតក្នុងជីវិតរស់នៅប្រចាំថ្ងៃរបស់ពួកគេ ក្នុងនោះបុរសម្នាក់ត្អូញត្អែរពីគ្រោះទុរ្ភិក្ស ហើយស្រ្តីម្នាក់បញ្ជាក់ពីកង្វះខាតការគាំទ្រ រួមទាំងឱសថ ។

លោក Mohammed Dakka គឺជាជនប៉ាឡេស្ទីនមួយរូបរស់នៅទីក្រុង Jabalia និយាយថា ពួកយើងរងគ្រោះដោយសារគ្រោះទុរ្ភិក្សដ៏អាក្រក់បំផុត គឺជាគ្រោះទុរ្ភិក្សគ្រប់រូបភាពទាំងអស់ ។

លោកថា តើអ្នកមានដឹងទេ បើទោះបីជាអ្នកមានសណ្តែកសៀង ៥គ.កនៅផ្ទះ ក៏អ្នកមិនដឹងថាត្រូវបរិភោគវាយ៉ាងម៉េចដែរ ពីព្រោះថាពួកយើងគ្មានអុសនោះទេ អ្នកត្រូវការប្រាក់ ១៤ដុល្លារ ដើម្បីទិញអុស ។ ព្រះអាចការពារពួកយើងបន្តិចបានទេ សូម្បីតែស្បែកជើងដាច់ កំណាត់រហែក ឬបូសក់ខូចក៏អ្នកត្រូវទិញវាដែរ ទិញវាយកមកបង្កាត់ភ្លើងចំអិនអាហារ ដើម្បីចិញ្ចឹមកូនៗរបស់អ្នក ។ ជីវិតរបស់ពួកយើងពិតជាជួបការលំបាកខ្លាំងណាស់ ។

ក្រសួងការបរទេសសហរដ្ឋអាមេរិក និយាយកាលពីថ្ងៃព្រហស្បតិ៍ថា ដំណោះស្រាយអាចចែកចាយស្បៀងអាហារទៅកាន់តំបន់ហ្កាហ្សា នៅមិនឆ្ងាយប៉ុន្មាននោះទេ ហើយសេចក្តីប្រកាសមួយនឹងកើតមានក្នុងពេលឆាប់ៗខាងមុខនេះ ស្របពេលដែលសហគមន៍ជំនួយ បង្ហាញមន្ទិលសង្ស័យចំពោះផែនការនាំជំនួយមនុស្សធម៌សម្រាប់ពលរដ្ឋញាំញីដោយសារជម្លោះនៅក្នុងដែនដីបិទច្រកមួយនេះ ។

ការរំពឹងទុកត្រូវបានបង្កើតឡើងពីផែនការជំនួយថ្មីសម្រាប់តំបន់ហ្កាហ្សា ដែលបានក្លាយជាកាកសំណល់ដោយសារយុទ្ធនាការសឹករយៈពេល ១៩ខែរបស់អ៊ីស្រាអែលប្រឆាំងក្រុមហាម៉ាស ដោយបានបំផ្លិចបំផ្លាញស្ទើតែទាំងស្រុងហេដ្ឋារចនាសម្ព័ន្ធក្នុងដែនដីមួយនេះ និងបានធ្វើឲ្យមនុស្សជិត ២,៣លាននាក់ ជម្លៀសខ្លួនជាច្រើនលើកច្រើនសារ ។

ក្រុមមេដឹកនាំអឺរ៉ុប និងក្រុមផ្តល់ជំនួយ បានរិះគន់ផែនការអ៊ីស្រាអែលក្នុងការគ្រប់គ្រងការចែកចាយជំនួយមនុស្សធម៌នៅតំបន់ហ្កាហ្សា ហើយនិងប្រើប្រាស់ក្រុមហ៊ុនឯកជន ដើម្បីនាំស្បៀងអាហារទៅដល់គ្រួសារ ក្រោយរយៈពេល ២ខែដែលយោធាការពាររារាំងកាផ្គត់ផ្គង់ស្បៀងចូលទៅក្នុងតំបន់ហ្កាហ្សា ។

ថ្លែងនៅក្នុងសន្និសីទសារព័ត៌មាន អ្នកនាំពាក្យក្រសួងការបរទេសសហរដ្ឋអាមេរិកអ្នកស្រី Tammy Bruce បានផ្តល់រឿងរ៉ាវលម្អិតតិចតួចប៉ុណ្ណោះជុំវិញយន្តការថ្មីនេះ ដោយគ្រាន់អ្នកស្រិនិយាយថា មូលនិធិសប្បុរសនឹងអនុវត្តផែនការ ៕