លោកមហាសេដ្ឋី Bill Gates បានសន្យាផ្តល់ថវិកា ២០០ពាន់លានដុល្លារតាមរយៈមូលនិធិសប្បុរសធម៌របស់លោកនៅឆ្នាំ ២០៤៥ ជាការពន្លឿនផែនការរបស់លោក ក្នុងការបរិច្ចាគទ្រព្យសម្បត្តិស្ទើតែទាំងអស់របស់លោក ។

ការប្រកាសបែបនេះ បានធ្វើឡើង បន្ទាប់ពីចំណាត់ការរបស់រដ្ឋាភិបាលជាច្រើន រួមទាំងរដ្ឋបាលរបស់ប្រធានាធិបតិសហរដ្ឋអាមេរិកលោក Donald Trump ដើម្បីកាត់បន្ថយថវិកាជំនួយអន្តរជាតិយ៉ាងច្រើនសន្ធឹកសន្ធាប់ដែលប្រើប្រាស់ ដើម្បីការពារជំងឺស្លាប់ និងគ្រោះទុរ្ភិក្ស ។

លោក Bill Gates និយាយថា ការសម្រេចចិត្តធ្វើបែបនេះ លោកបានគិតច្រើនឆ្នាំមកហើយ ហើយនិងបានជជែកជាមួយក្រុមប្រឹក្សាភិបាលមូលនិធិ ។ ដូច្នេះហើយ វាពិតជាមិនកើតឡើងដោយសារការពិតដែលពួកយើងបច្ចុប្បន្នស្ថិតក្នុងស្ថានភាពអាស្នននោះទេ ។

មហាសេដ្ឋីវ័យ ៦៩ឆ្នាំ និងជាសហស្ថាបនិកក្រុមហ៊ុន Microsoft រូបនេះ និយាយថា លោកនឹងបិទមូលនិធិសប្បុរសធម៌របស់លោកនៅថ្ងៃទី ៣១ ខែធ្នូ ឆ្នាំ ២០៤៥ ពោលគឺមានរយៈពេលច្រើនឆ្នាំលឿនជាងផែនការលើកមុន ។

លោកនិយាយថា លោកមានជំនឿថា លុយទំាងនេះ នឹងជួយលុបបំបាត់ជំងឺជាច្រើន ដូចជាជំងឺស្វិតដៃជើង និងគ្រុនចាញ់ បញ្ចប់ការស្លាប់នៅក្នុងចំណោមស្រ្តី និងកុមារ ហើយនិងកាត់បន្ថយភាពក្រីក្រសកល ។

លោកបន្តថា លោកគិតថា នៅរយៈពេល ២០ឆ្នាំបន្ទាប់ អង្គការដ៏អស្ចារ្យមួយនេះ ជាមួយដៃគូអស្ចារ្យជាច្រើនទៀត លោកចង់ឲ្យពួកគេអាចធ្វើការក្នុងកម្រិតអតិបរមា ។

លោក Bill Gates បានរិះគន់ខ្លាំងៗផងដែរដល់លោក Elon Musk ដែលគ្រប់គ្រងក្រសួងប្រសិទ្ធិភាពរដ្ឋាភិបាល គឺជាស្ថាប័នមួយត្រួតត្រាការកាត់បន្ថយជំនួយដល់ទីភ្នាក់ងារ USAID ។ លោកនិយាយថា កាយវិការរបស់អ្នកមានជាងគេនៅលើពិភពលោករូបនេះ សម្លាប់ក្មេងៗក្រីក្របំផុតរបស់ពិភពលោក មិនមែនជារឿងល្អទាល់តែសោះ ៕