គិតត្រឹមថ្ងៃទី១០ ខែឧសភា ឆ្នាំ២០២៥នេះ ជាថ្ងៃបញ្ចប់នៃការរៀបចំពិព័រណ៍ការងារ និង​មគ្គទេសក៍អាជីពដ៏ធំ ដែលរៀបចំឡើងដោយ ទីភ្នាក់ងារជាតិមុខរបរ និងការងារ (NEA) សហការ​ជាមួយសហភាពសហព័ន្ធយុវជនកម្ពុជារាជធានីភ្នំពេញ និងសភាពាណិជ្ជកម្មកម្ពុជា-អ៊ីស្រាអែល។ ទន្ទឹមនេះ បានកត់សម្គាល់ឃើញថា កម្មវិធីនេះ បានផ្តល់ទាំងឱកាសការងារ និង​គន្លឹះសំខាន់ៗជាច្រើន ក្នុងការស្វែងរកការងារប្រកបដោយប្រសិទ្ធភាព។

លោក​ស្រី អ៊ូច ជាច័ន្ទមល្លិកា ប្រធានទីភ្នាក់ងារជាតិមុខរបរ និងការងារ (NEA) នៃក្រសួងការងារ និង​បណ្តុះបណ្តាលវិជ្ជាជីវៈ បានមានប្រសាសន៍ឲ្យដឹងថា ពិព័រណ៍ការងារនេះ បាន​ក្លាយ​ជា​ព្រឹត្តិការណ៍​ការងារ​ដ៏សកម្ម និងរស់រវើក ទាំងការរៀបចំផ្ទាល់នៅមួយកន្លែង និងតាមរយៈ​ប្រព័ន្ធ​អន​ឡាញ ដោយបានកៀរគរ​ប្រមូល​ផ្តុំ​និយោជក​ពី​វិស័យ​សំខាន់​ៗ​ឱ្យ​ចូល​រួម​តាំង​បង្ហាញ​អំពី​ឱកាស​ការងារ និងការជ្រើសរើសកម្លាំងពលកម្មដែលមានសក្តានុពល ព្រមទាំងបើក​ឱកាស​ទូលំ​ទូលាយ​សម្រាប់សិស្ស និស្សិត យុវជន និងអ្នកស្វែងរកការងារ ដើម្បីបង្កើនជម្រើសការងារ និង​ការ​ដាក់​ពាក្យស្នើសុំការងារដែលខ្លួនពេញចិត្ត។ 

លោកស្រីប្រធាន បានបន្តថា កម្មវិធីនេះដែរ មានការចូលរួមពីសំណាក់ក្រុមហ៊ុន-សហ​គ្រាស​ចំនួន​៣១ ដែលបាននាំយកឱកាសការងារគ្រប់ប្រភេទជាង ៥,៤០០កន្លែង ដើម្បីតាំងបង្ហាញ សម្ភាស ជ្រើសរើស និងបើកឱកាសដល់អ្នកដាក់ពាក្យស្នើសុំការងារ ដោយ​ក្នុង​នោះ​មាន​មុខ​តំណែង​គ្រប់​ប្រភេទក្នុងវិស័យធនាគារ, ធានារ៉ាប់រងនិងគ្រឹះស្ថានមីក្រូហិញ្ញវត្ថុ, អេឡិចត្រូនិក និង​ព័ត៌មានវិទ្យាជាដើម។

ក្រុម​យុវជនដែលបានចូលរួមពិព័រណ៍ការងារ និងមគ្គទេសក៍អាជីពនេះ បានលើកឡើងថា កម្ម​វិធី​នេះ​ពិត​ជា​មានសារៈសំខាន់ និងផ្តល់អត្ថប្រយោជន៍ជាច្រើនណាស់ ដើម្បីឱ្យសិស្ស និស្ស និង​យុវជន​អាច​ស្វែងយល់អំពីឱកាសការងារ ទាំងពេលបច្ចុប្បន្ន និងទៅអនាគត ជាពិសេស​ទទួល​បាន​បទ​ពិសោធន៍ក្នុងការត្រៀមខ្លួនចូលទីផ្សារការងារ។ ក្រុមយុវជន បានអំពាវនាវដល់យុវជន សិស្ស និស្សិត ក៏ដូចជាអ្នកស្វែងរកការងារទាំងអស់ អាចចូលរួមទស្សនាដោយសេរី ដើម្បី​ស្វែង​យល់​អំពី​ទីផ្សារ​ការងារ និងដាក់ពាក្យសម្ភាសន៍ការងារភ្លាមៗនៅក្នុងកម្មវិធីមួយនេះផងដែរ។

គិត​មកដល់ពេលនេះ ទីភ្នាក់ងារជាតិមុខរបរ និងការងារ (NEA) បានរៀបចំឱ្យពិព័រណ៍ការងារ និង​មគ្គទេសក៍អាជីពនេះជារៀងរាល់ឆមាស សរុបចំនួន៤លើកមកហើយ ដោយមាន​អ្នក​អ្នក​ចូល​រួម​ផ្ទាល់​ចំនួនជាង ១ម៉ឺន ១ពាន់នាក់ ក្នុងរយៈពេល៣ឆ្នាំចុងក្រោយនេះ (គិតចាប់ពីឆ្នាំ២០២២-២០២៤)។

សូមបញ្ជាក់ទៀតថា កម្មវិធីនេះដែរ ធ្វើឡើងក្នុងគោលបំណងសំខាន់បំផុត គឺការ​បង្កើត​ជា​វេទិកា​ប្រាស្រ័យ​ទាក់​ទងគ្នាដោយផ្ទាល់នៅមួយកន្លែង ដើម្បីស្វែងយល់ពីតម្រូវការការងារ ការជ្រើស​រើស​កម្លាំង​ពលកម្ម និងការដាក់ពាក្យស្នើសុំការងារជូនដល់សាធារណជន ដើម្បីកាន់តែងាយស្វែងរក ងាយ​ចូលរួម ឆ្លើយតបឆាប់រហ័ស និងចំគោលដៅ៕ អត្ថបទ៖ ឈិត បូរ៉ាវី