ទង់ជាតិរបស់ប្រទេសឥណ្ឌា និងរូបសំណាករបស់នាយករដ្ឋមន្ត្រី លោក Narendra Modi ត្រូវបានដុតក្នុងអំឡុងពេលការតវ៉ាមួយនៅប្រទេសប៉ាគីស្ថាន កាលពីថ្ងៃសុក្រ ដែលរៀបចំដោយចលនាអ៊ីស្លាមនិយម ប្រកាន់តឹង។ ប្រទេសប៉ាគីស្ថាន និងប្រទេសឥណ្ឌា បានប៉ះទង្គិចគ្នា ចាប់តាំងពីឥណ្ឌា បានវាយប្រហារលើតំបន់ជាច្រើនដែលខ្លួនបានចាត់ទុកថាជា «ហេដ្ឋារចនាសម្ព័ន្ធរបស់ក្រុមភេរវករ» នៅក្នុងទឹកដីប្រទេសប៉ាគីស្ថានកាលពីថ្ងៃពុធ ទី៧ ខែឧសភា ក្នុងការសងសឹកចំពោះការវាយប្រហារដ៏បង្ហូរឈាមទៅលើអ្នកទេសចរហិណ្ឌូនៅតំបន់កាស្មៀរគ្រប់គ្រងដោយប្រទេសឥណ្ឌា កាលពីខែមុន។

ប៉ាគីស្ថាន បានច្រានចោលការចោទប្រកាន់របស់ឥណ្ឌា ដែលថាខ្លួនបានជាប់ពាក់ព័ន្ធនឹងការវាយប្រហារលើអ្នកទេសចរ។ ប្រទេសទាំងពីរ បានបាញ់តគ្នា និងបាញ់ផ្លោងឆ្លងព្រំដែន ហើយពួកគេបានបញ្ជូនយានដ្រូន និងមីស៊ីល ចូលទៅក្នុងដែនអាកាសទៅវិញទៅមក។ 

ជាមួយគ្នានេះ ប្រជាជននៅក្នុងតំបន់កាស្មៀរគ្រប់គ្រងដោយប៉ាគីស្ថាន បានមកពិនិត្យមើលការខូចខាតទ្រព្យសម្បត្តិរបស់ពួកគេកាលពីថ្ងៃសុក្រ បន្ទាប់ពីបានចំណាយពេលមួយយប់នៅក្នុងទីជម្រកគេចចេញពីការបាញ់ផ្លោង។ នៅតំបន់កាស្មៀរប៉ាគីស្ថាន ក្រុមមន្ត្រីបាននិយាយថា ការបាញ់ផ្លោងយ៉ាងសន្ធឹកសន្ធាប់ឆ្លងព្រំដែន បានសម្លាប់ជនស៊ីវិល៥នាក់ រួមទាំងទារកម្នាក់ និង២៩នាក់ផ្សេងទៀតរងរបួស កាលពីថ្ងៃសុក្រ។ ការប្រយុទ្ធគ្នានេះ គឺជាការសម្លាប់មនុស្សច្រើនបំផុត ចាប់តាំងពីជម្លោះរវាងប្រទេសទាំងពីរក្នុងស្រុក Kargil តំបន់កាស្មៀរក្នុងឆ្នាំ ១៩៩៩។

យោងតាមការប៉ាន់ប្រមាណការស្លាប់និងរងរបួសនៅភាគីទាំងសងខាងព្រំដែនដែលពុំត្រូវបានផ្ទៀងផ្ទាត់ដោយឯករាជ្យបានឲ្យដឹងថា មនុស្សជិត៥០នាក់ ត្រូវបានសម្លាប់ចាប់តាំងពីថ្ងៃពុធ សប្តាហ៍នេះ។