ខេត្តសៀមរាប៖ នៅថ្ងៃទី១២ ដល់ថ្ងៃទី១៣ ខែឧសភា ឆ្នាំ២០២៥ ឯកឧត្តម ជុន វ៉ាត រដ្ឋលេខា​ធិការ និងជាប្រធានក្រុមការងារអនុវត្តគម្រោងសុវត្ថិភាពលើប្រព័ន្ធអនឡាញ ក្រសួងប្រៃសណីយ៍​និង​ទូរ​គមនាគមន៍(ក.ប.ទ.) នឹងអញ្ជើញជាអធិបតីបើកសិក្ខាសាលាបច្ចេកទេសលើការអនុវត្ត “គោល​ការណ៍ណែនាំស្តីពីកិច្ចការពារកុមារលើ ប្រព័ន្ធអនឡាញ​សម្រាប់​ក្រុ​ម​ហ៊ុន​បច្ចេក​វិទ្យា​ឌីជីថល​នៅ​កម្ពុជា” ក្រោមប្រធានបទ “បង្កើតបរិស្ថានឌីជីថល ប្រកបដោយ​សុវត្ថិភាព​សម្រាប់​កុមារ​កម្ពុជា” រៀបចំឡើងនៅ Siem Reap House, Rose Apple Square ក្រុង សៀមរាប ដោ​យ​មាន​ការចូលរួមពីថ្នាក់ដឹងនាំរួមមាន៖ លោកជំទាវរដ្ឋលេខាធិការ លោកជំទាវអនុរដ្ឋលេខាធិការ ឯក ឧត្តអគ្គនាយក និងមន្ត្រីរាជាការក្រោមឱវាទ ក.ប.ទ សរុបប្រមាណ ៩០រូប។ សិក្ខាសាលានេះមានការចូលរួមធ្វើបទ បង្ហាញ និងបើកកិច្ចពិភាក្សាពីអ្នកជំនាញ និងវាគ្មិនមកពី អង្គការសកម្មភាពដើម្បីកុមារ (APLE Cambodia) មន្ត្រី បច្ចេកទេសសន្តិសុខសាយប័រ មន្ត្រីនីតិកម្មនៃនិយ័តករទូរគមនាគមន៍កម្ពុជា និងក្រុមការងារអនុវត្តគម្រោងសុវត្ថិ ភាពលើប្រព័ន្ធអនឡាញ ក.ប.ទ ដោយផ្តោតលើប្រធានបទ៖

១. កិច្ចពិភាក្សាផ្លាស់ប្តូរគំនិត និងចែករំលែកចំណេះដឹងពាក់ព័ន្ធនឹងហានិភ័យ និងគ្រោះថ្នាក់លើ ប្រព័ន្ធអនឡាញសម្រាប់កុមារ និងប្រជាជនទូទៅកើតមានឡើងនៅកម្ពុជានាពេបច្ចុប្បន្នក្នុងបរិវត្តកម្មនៃបច្ចេកវិទ្យា បញ្ញាសិប្បនិម្មិត Generative AI បច្ច័យនានាលើសន្តិសុខសាយប័រ និងសុវត្ថិភាពលើប្រព័ន្ធអនឡាញ។

២. ស្វែងរកដំណោះស្រាយសក្តានុពលដើម្បីឆ្លើយតបទាន់ពេលវេលាទៅនឹងហានិភ័យ និងគ្រោះ ថ្នាក់នានាដែលកើតមានឡើងលើប្រព័ន្ធអនឡាញ និងបញ្ហាប្រឈមដែលកើតមានឡើងនាពេលអនាគត។

៣. ជំរុញការអនុវត្តគោលការណ៍ណែនាំ COP Guidelines និងសិក្សាអំពីអនុលោមភាពនីតិវិធីផ្ទៃ ក្នុងក្រុមហ៊ុន (Code of Conduct) ស្តីពីកិច្ចការពារកុមារលើប្រប័ព្ទអនឡាញដាក់បញ្ចូលជាកាតព្វកិច្ចសម្រាប់ក្រុមហ៊ុនបច្ចេកវិទ្យាឌីជីថល ដែលបានចុះបញ្ជី។

៤. លើកកម្ពស់ការយល់ដឹងស្តីពីសុវត្ថិភាពលើប្រព័ន្ធអនឡាញ ដល់មន្ត្រីរាជការក្រោមឱវាទ ក.ប.ទ និងកំណត់កាលានុវត្តភាពដើម្បីបង្កើតបរិស្ថានឌីជីថលប្រកបដោយសុវត្ថិភាពនៅកម្ពុជា។