ក្រុមអ្នកស្រុកនៅទូទាំងប្រទេសប៉ាគីស្ថាន និងឥណ្ឌា បានប្រញាប់ប្រញាល់ស្តុកទុកស្បៀងអាហារ និងការផ្គត់ផ្គង់សំខាន់ៗផ្សេងទៀត ខណៈបណ្ដាក្រុមគ្រួសារដែលរស់នៅក្បែរព្រំដែនបានភៀសខ្លួនទៅកាន់តំបន់ដែលមានសុវត្ថិភាព ស្របពេលការប៉ះទង្គិចប្រដាប់អាវុធរវាងប្រទេសមានអាវុធនុយក្លេអ៊ែរជិតខាងទាំងពីរ បានកើនឡើងកាន់តែក្ដៅគគុកកាលពីថ្ងៃសុក្រសប្ដាហ៍នេះ។

ឥណ្ឌា និងប៉ាគីស្ថាន បានចោទប្រកាន់គ្នាទៅវិញទៅមកថាបានបើកការវាយប្រហារយោធាថ្មីៗ ដោយយានដ្រូន និងកាំភ្លើងធំរយៈពេលបីថ្ងៃ ក្នុងការប្រយុទ្ធគ្នាដ៏ធ្ងន់ធ្ងរបំផុតរវាងប្រទេសទាំងពីរក្នុងរយៈពេលជិតបីទសវត្សរ៍។  

ជម្លោះនេះបានផ្ទុះឡើងបន្ទាប់ពីឥណ្ឌាបានវាយប្រហារទីតាំងជាច្រើននៅក្នុងប្រទេសប៉ាគីស្ថានកាលពីថ្ងៃពុធសប្ដាហ៍នេះ ដែលខ្លួនបាននិយាយថាជា "ជំរំក្រុមភេរវករ" ក្នុងការសងសឹកចំពោះការវាយប្រហារដ៏សាហាវទៅលើអ្នកទេសចរហិណ្ឌូនៅក្នុងតំបន់កាស្មៀគ្រប់គ្រងដោយឥណ្ឌាកាលពីខែមុនសម្លាប់មនុស្សចំនួន២៦ នាក់។

នៅក្នុងរដ្ឋ Punjab ប្រទេសឥណ្ឌា លោក Amanpreet Dhillon អាយុ ២៦ឆ្នាំបាននិយាយថា គ្រួសារជាច្រើននៅក្នុងភូមិរបស់លោកដែលមានចម្ងាយត្រឹមតែ ១៣ គីឡូម៉ែត្រ ពីព្រំដែនជាមួយប្រទេសប៉ាគីស្ថាន បានបញ្ជូនស្ត្រី និងកុមារទៅកាន់តំបន់សុវត្ថិភាពរួចហើយ៕