ក្រុមមេដឹកនាំបារាំង អង់គ្លេស អាល្លឺម៉ង់ និងប៉ូឡូញ បានទៅដល់ទីក្រុងគីវរបស់អ៊ុយក្រែនសម្រាប់កិច្ចពិភាក្សាជាមួយប្រធានាធិបតី Volodymyr Zelenskyy និងដាក់សម្ពាធលើរុស្ស៊ីឲ្យយល់ព្រមលើបទឈប់បាញ់រយៈពេល៣០ថ្ងៃ ជាជំហានមួយឆ្ពោះទៅរកការបញ្ចប់ជម្លោះរយៈពេលជាង៣ឆ្នាំ។ 

លោក Emmanuel Macron អធិការបតីអាល្លឺម៉ង់លោក Friedrich Merz និងនាយករដ្ឋមន្ត្រីអង់គ្លេសលោក Keir Starmer បានទៅដល់តាមរថភ្លើងរួមគ្នាពីប្រទេសជិតខាងប៉ូឡូញ នៅថ្ងៃសៅរ៍នេះ ក្រោយមកត្រូវបានចូលរួមដោយនាយករដ្ឋមន្ត្រីប៉ូឡូញ លោក Donald Tusk។

លោក Andriy Yermak ប្រធានបុគ្គលិករបស់លោក Zelenskyy បានបង្ហោះរូបភាពស្វាគមន៍ក្រុមមេដឹកនាំក្បែររថភ្លើង ដោយនិយាយថាមានការងារច្រើនណាស់ត្រូវធ្វើ ហើយក៏មានប្រធានបទត្រូវពិភាក្សាច្រើនដែរ។យើងត្រូវតែបញ្ចប់សង្គ្រាមដើម្បីទទួលបានសន្តិភាព។យើងត្រូវតែបង្ខំឲ្យទីក្រុងមូស្គូ យល់ព្រមបទឈប់បាញ់មួយ។ 

នេះគឺជាលើកទីមួយហើយសម្រាប់ក្រុមមេដឹកនាំចំនួន៤របស់ប្លុកអឺរ៉ុបបានចូលរួមដំណើរទស្សនកិច្ចក្នុងពេលតែមួយបែបនេះទៅកាន់ប្រទេសអ៊ុយក្រែន៕