មហាអំណាចអឺរ៉ុបធំៗបានព្រមព្រៀងឲ្យមានបទឈប់បាញ់អ៊ុយក្រែនរយៈពេល ៣០ ថ្ងៃដោយគ្មានលក្ខខណ្ឌនៅចុងសប្ដាហ៍នេះដោយមានការគាំទ្រពីប្រធានាធិបតីអាមេរិកលោក Donald Trump និងបានគំរាមលោកប្រធានាធិបតីរុស្ស៊ី Vladimir Putin ចំពោះការដាក់ទម្ងន់ទណ្ឌកម្មថ្មីដ៏ធំ ប្រសិនបើលោកមិនទទួលយកក្នុងរយៈពេលប៉ុន្មានថ្ងៃខាងមុខ។

ក្នុងកិច្ចប្រជុំមួយក្នុងទីក្រុង Kyiv ក្នុងអំឡុងក្រុមមេដឹកនាំអឺរ៉ុប បានជួបសន្ទនាតាមទូរស័ព្ទជាមួយលោក Trump មេដឹកនាំនៃប្រទេស បារាំង អង់គ្លេស អាល្លឺម៉ង់ ប៉ូឡូញ និងអ៊ុយក្រែន បានកំណត់ការចាប់ផ្តើមនៃបទឈប់បាញ់សម្រាប់ថ្ងៃទី ១២ ខែឧសភា។

នាយករដ្ឋមន្ត្រីចក្រភពអង់គ្លេសលោក Kier Starmerនិយាយថា ពួកលោកទាំងអស់គ្នានៅទីនេះ រួមជាមួយសហរដ្ឋអាមេរិកកំពុងអំពាវនាវដល់លោកប្រធានាធិបតីរុស្ស៊ី Vladimir Putin ។ ប្រសិនបើលោកយកចិត្តទុកដាក់ចំពោះសន្តិភាព នោះលោកមានឱកាសបង្ហាញឥឡូវនេះ ដោយការបន្ថែមពេលផ្អាកប្រយុទ្ធសម្រាប់ទិវាជ័យជម្នះ ទៅជាបទឈប់បាញ់រយៈពេល៣០ ថ្ងៃពេញដោយគ្មានលក្ខខណ្ឌ។ ជាមួយនឹងការចរចាដើម្បីអនុវត្តតាមភ្លាមៗ នៅពេលបទឈប់បាញ់ត្រូវបានយល់ព្រមដោយគ្មានការពន្យារពេល។ 

ភ្លាមៗបន្ទាប់ពីការប្រកាសនេះ អ្នកនាំពាក្យវិមានក្រឹមឡាំង លោក Dmitry Peskov បានចោទប្រកាន់បណ្តាប្រទេសអឺរ៉ុបថា បានធ្វើសេចក្តីថ្លែងការណ៍ផ្ទុយ និងបង្កឲ្យមានការប្រឈមដាក់គ្នា។

លោក Trump ដែលមិនបានធ្វើអត្ថាធិប្បាយជាសាធារណៈភ្លាមៗលើការអត្ថាធិប្បាយរបស់ក្រុមមេដឹកនាំអឺរ៉ុប បានបង្ហាញពីការខកចិត្តចំពោះអ្វីដែលទីក្រុងវ៉ាស៊ីនតោនចាត់ទុកជាការអូសពេលរបស់រុស្ស៊ីជុំវិញបទឈប់បាញ់នេះ៕