ក្រុមអ្នកចរចាជាន់ខ្ពស់របស់អ៊ីរ៉ង់ និងសហរដ្ឋអាមេរិក នឹងបន្តកិច្ចចរចាឡើងវិញនៅថ្ងៃអាទិត្យនេះ ដើម្បីដោះស្រាយវិវាទជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់ ក្នុងការជំរុញឱ្យមានវឌ្ឍនភាព     ខណៈក្រុងវ៉ាស៊ីនតោនពង្រឹងជំហររបស់ខ្លួនមុនដំណើរទស្សនកិច្ចនៅមជ្ឈិមបូព៌ារបស់ប្រធានាធិបតីអាមេរិក លោក Donald Trump។ 

ទោះបីជាទាំងទីក្រុងតេអេរ៉ង់ ទាំងក្រុងវ៉ាស៊ីនតោន បាននិយាយថា ពួកគេចូលចិត្តផ្លូវការទូតដើម្បីដោះស្រាយជម្លោះដ៏យូរច្រើនទស្សវត្សន៍ក៏ដោយ ពួកគេនៅខ្វែងគំនិតគ្នាកប់យ៉ាងជ្រៅលើបន្ទាត់ក្រហមជាច្រើនដែលក្រុមអ្នកចរចានឹងត្រូវចៀសវាងដើម្បីឈានដល់កិច្ចព្រមព្រៀងនុយក្លេអ៊ែរថ្មី និងទប់ស្កាត់សកម្មភាពយោធានាពេលអនាគត។

រដ្ឋមន្ត្រីការបរទេសអ៊ីរ៉ង់ លោក Abbas Araqchi និងបេសកជនមជ្ឈិមបូព៌ារបស់លោក Trump លោក Steve Witkoff នឹងរៀបចំកិច្ចចរចាជុំទី ៤ នៅទីក្រុងមុស្កាត(Muscat) តាមរយៈក្រុមអ្នកសម្របសម្រួលប្រទេសអូម៉ង់ ទោះបីជាទីក្រុងវ៉ាស៊ីនតោន ប្រកាន់ជំហរតឹងតែងជាសាធារណៈ ដែលមន្ត្រីអ៊ីរ៉ង់បាននិយាយថា នឹងមិនជួយដល់ការចរចាក៏ដោយ។

លោក Witkoff បានប្រាប់សារព័ត៌មាន Breitbart News កាលពីថ្ងៃព្រហស្បតិ៍ថា បន្ទាត់ក្រហមរបស់ទីក្រុងវ៉ាស៊ីនតោនគឺ គ្មានការចម្រាញ់សារធាតុអ៊ុយរ៉ានីញ៉ូម។ មានន័យថា រំសាយ គ្មានអាវុធនុយក្លេអ៊ែរ ដែលទាមទារឱ្យមានការរំសាយចោលទាំងស្រុងនូវរោងចក្រផលិតនុយក្លេអ៊ែររបស់អ៊ីរ៉ង់នៅរោងចក្រ Natanz រោងចក្រ Fordow និងរោងចក្រ Isfahan ។

លោក Witkoff បាននិយាយនៅក្នុងបទសម្ភាសន៍ថា ប្រសិនបើការចរចាមិនមានការរីកចម្រើននៅថ្ងៃអាទិត្យទេ នោះពួកគេនឹងមិនបន្តទេ ហើយយើងនឹងត្រូវដើរតាមផ្លូវផ្សេងគ្នា៕