អ្នកគាំទ្រយោធាប៉ាគីស្ថាន បានចេញមកប្រមូលផ្តុំគ្នាទីក្រុង Lahore និងទីក្រុង Islamabad កាលពីថ្ងៃអាទិត្យ ទី១១ ឧសភា ជាការប្រមូលផ្តុំ «ការពារប៉ាគីស្ថាន» ដោយសរសើរដល់កងកម្លាំងប្រដាប់អាវុធប៉ុន្មានថ្ងៃបន្ទាប់ពីមានបទឈប់បាញ់ដ៏តានតឹង បានបញ្ឈប់ការប៉ះទង្គិចគ្នាជាមួយប្រទេសជិតខាងឥណ្ឌា។

នៅទីក្រុង Lahore គណបក្សសាសនា Tahaffuz Namoos-e-Risalat Mahaz (TNRM) បានរៀបចំ «ការប្រមូលផ្តុំគ្នាការពារប្រទេសប៉ាគីស្ថាន» នៅកន្លែងដែលអ្នកតវ៉ាបានគ្រវីទង់ជាតិ និងកាន់បដារិះគន់គោលនយោបាយរបស់ប្រទេសឥណ្ឌា។

លោកបណ្ឌិត Allama Raghib Naeemi ប្រធានក្រុមប្រឹក្សាមនោគមវិជ្ជាឥស្លាម បានថ្លែងទៅកាន់ហ្វូងមនុស្សដោយរិះគន់ការដោះស្រាយរបស់ប្រទេសឥណ្ឌាចំពោះឧប្បត្តិហេតុភេរវកម្មនៅក្រុងPahalgam កាលពីពេលថ្មីៗនេះ។

នៅទីក្រុងអ៊ីស្លាម៉ាបាដ ក្បួនរថយន្តនគរបាលបានរៀបចំពិធីដង្ហែទង់ជាតិ ក្នុងការបង្ហាញការគាំទ្រដល់កងទ័ពប៉ាគីស្ថាន បន្ទាប់មកការប្រមូលផ្តុំគ្នាមួយត្រូវបានរៀបចំឡើងដោយអង្គការសាសនានិស្សិតមូស្លីម Talba Mahaz Pakistan (MTMP) ។

ក្រុមអ្នកតវ៉ា បានបង្ហាញពីបំណងប្រឆាំងប្រទេសឥណ្ឌាយ៉ាងខ្លាំង ដោយមានបដាសរសេរថាឥណ្ឌាជា «ភេរវករ» និងរូបភាពខូចទ្រង់ទ្រាយរបស់នាយករដ្ឋមន្ត្រីឥណ្ឌា លោក Narendra Modi និងប្រធានាធិបតីអាមេរិក លោក Donald Trump។ ប្រទេសជិតខាងដែលមានអាវុធនុយក្លេអ៊ែរទទាំងពីរ ឥណ្ឌា និងប៉ាគីស្ថាន បានព្រមព្រៀងបទឈប់បាញ់គ្នាកាលពីថ្ងៃសៅរ៍ ទី១០ ខែឧសភា បន្ទាប់ពីសម្ពាធរបស់សហរដ្ឋអាមេរិក និងការប្រយុទ្ធគ្នារយៈពេលបួនថ្ងៃ។