លោកប្រធានាធិបតី Donald Trump កាលពីថ្ងៃអាទិត្យ បានគាំទ្រការអំពាវនាវរបស់ប្រធានាធិបតីរុស្ស៊ីលោក Vladimir Putin សម្រាប់កិច្ចចរចាដោយផ្ទាល់ជាមួយអ៊ុយក្រែន ដោយមិនគោរពកិច្ចព្រមព្រៀងនៃរដ្ឋបាលរបស់លោកជាមួយមេដឹកនាំអឺរ៉ុប ដែលបានប្រកាសក្នុងរយៈពេលមិនដល់ ២៤ ម៉ោងមុន។

ប្រធានាធិបតីអាមេរិកលោក Donald Trump បានជំរុញឱ្យអ៊ុយក្រែនយល់ព្រមភ្លាមៗ ចំពោះសំណើនៃកិច្ចចរចាដោយផ្ទាល់ដោយគ្មានលក្ខខណ្ឌ ដែលដាក់ដោយប្រធានាធិបតីរុស្ស៊ីលោក Vladimir Putin កាលពីព្រឹកថ្ងៃអាទិត្យ។

កាលពីថ្ងៃសៅរ៍ ក្រុមមេដឹកនាំនៃប្រទេសបារាំង អង់គ្លេស អាល្លឺម៉ង់ និងប៉ូឡូញ បានជួបពិភាក្សាជាមួយប្រធានាធិបតីអ៊ុយក្រែន លោក Volodymyr Zelensky ហើយបានទាមទារឱ្យលោក Putin ទទួលយកបទឈប់បាញ់រយៈពេល ៣០ថ្ងៃ ដោយចាប់ផ្តើមពីថ្ងៃចន្ទនេះ ពុំនោះនឹងមើលឃើញការដាក់ទណ្ឌកម្មកើនឡើង។

មេដឹកនាំទាំងនោះបាននិយាយថាលោកTrump បានចូលរួមជាមួយពួកលោកក្នុងការទាមទារ ដែលជាការវិវត្តន៍ដ៏សំខាន់មួយ។បេសកជនរបស់លោក Trump ប្រចាំប្រទេសរុស្ស៊ី និងអ៊ុយក្រែន បានបង្ហោះរូបភាពរបស់មេដឹកនាំអឺរ៉ុបជាថ្មីក្នុងការហៅទូរស័ព្ទជាមួយលោក ហើយបាននិយាយថា បទឈប់បាញ់រយៈពេល ៣០ ថ្ងៃនឹងចាប់ផ្តើមដំណើរការបញ្ចប់សង្រ្គាម។

ជាការឆ្លើយតប លោក Putin បានស្នើឱ្យមានការចរចាដោយផ្ទាល់ដែលនឹងចាប់ផ្តើមនៅថ្ងៃព្រហស្បតិ៍នៅទីក្រុងអ៊ីស្តង់ប៊ុល ប្រទេសទួរគី។ លោក Zelensky បាននិយាយថា លោកនឹងបើកចំហសម្រាប់ការចរចាដោយផ្ទាល់ នៅពេលបទឈប់បាញ់ត្រូវបានយល់ព្រម៕