បន្ទាប់ពីចំណាយពេលជាច្រើនថ្ងៃនៅក្នុងជម្រកបណ្ដោះអាសន្ន និងជាមួយសាច់ញាតិ ប្រជាជនមកពីភាគីទាំងពីរនៃព្រំដែនឥណ្ឌា និងប៉ាគីស្ថាន មានការសង្ស័យអំពីបទឈប់បាញ់នៅចុងសប្តាហ៍នេះ ហើយភ័យខ្លាចមិនហ៊ានប្រញាប់ត្រឡប់ទៅកាន់ភូមិរបស់ពួកគេវិញភ្លាមៗទេ។

ទីតាំងរបស់ឥណ្ឌាជាច្រើនដូចជា ភូមិ Jammu និង Amritsar ដែលគ្របដណ្ដប់ដោយសំឡេងផ្ទុះបន្ទាប់ពីបទឈប់បាញ់បានព្រមព្រៀងនោះ នៅតែស្ងប់ស្ងាត់ជាងធម្មតាកាលពីថ្ងៃអាទិត្យ (១១ ឧសភា) ដោយហាងលក់ដូរជាច្រើននៅតែបិទទ្វារ ហើយមនុស្សម្នាជ្រើសរើសស្នាក់នៅក្នុងផ្ទះ។ អាជ្ញាធរឥណ្ឌា និងប៉ាគីស្ថាន បានណែនាំប្រជាជនដែលចាកចេញពីតំបន់ព្រំដែន មិនត្រូវត្រឡប់ទៅភូមិជួរមុខវិញទេ។

មនុស្សរាប់រយនាក់បានរត់ភៀសខ្លួនទៅជម្រកបណ្តោះអាសន្ន ខណៈអ្នកផ្សេងទៀតចាកចេញទៅស្នាក់នៅជាមួយសាច់ញាតិឆ្ងាយពីព្រំដែន ស្របពេលការប្រយុទ្ធកាន់តែខ្លាំងឡើងកាលពីដើមសប្តាហ៍មុន។

លោក Kabal Singh ប្រធានភូមិមួយនៅជិតព្រំដែនបាននិយាយថា ប្រជាជនសងខាងនៃព្រំដែន មានការភ័យខ្លាចមិនហ៊ានឡប់ទៅវិញ បន្ទាប់ពីឮដំណឹងថានៅតែមានសំឡេងផ្ទុះ បន្ទាប់ពីការប្រកាសបទឈប់បាញ់។ មន្ត្រីរដ្ឋបាលម្នាក់ក្នុងតំបន់នៅជ្រលងភ្នំ Neelum របស់ប៉ាគីស្ថាន និយាយថា "អ្នកស្រុកជាច្រើនកំពុងរង់ចាំមើលថាតើស្ថានការណ៍វិវឌ្ឍយ៉ាងដូចម្តេច មុនពេលសម្រេចចិត្តត្រឡប់ទៅវិញ"។

បន្ទាប់ពីការប្រយុទ្ធគ្នាអស់ ៤ថ្ងៃ ឥណ្ឌា និងប៉ាគីស្ថាន បានព្រមព្រៀងបទឈប់បាញ់កាលពីថ្ងៃសៅរ៍ចុងសប្ដាហ៍ ក្រោមសម្ពាធរបស់សហរដ្ឋអាមេរិក ប៉ុន្តែក្នុងប៉ុន្មានម៉ោងក្រោយមក សំឡេងផ្ទុះបានលាន់លឺនៅតាមទីប្រជុំជនព្រំដែន ហើយឥណ្ឌា បានចោទប៉ាគីស្ថាន ថារំលោភលើកិច្ចព្រមព្រៀងនេះ នៅក្នុងអ្វីដែលប៉ាគីស្ថានបដិសេធ៕