ភ្នំពេញ៖ បុរសជនជាតិចិនម្នាក់ ត្រូវបាននគរបាលនៃអធិការដ្ឋាននគរបាលខណ្ឌ៧មករា ឃាត់ខ្លួន ក្រោយទាញកាំភ្លើងខ្លី បាញ់គំរាមចំនួន០២គ្រាប់ គ្រាន់តែសន្តិសុខ ហាមមិនអោយជក់បារីពេល​ចូលក្នុងហាង ភោជនីយដ្ឋាន បង្កការភ្ញាក់ផ្អើល។

ហេតុការណ៍នេះ បង្កឡើងកាលពីវេលាម៉ោង២និង៥០នាទីរំលងអាធ្រាតឈានចូល ថ្ងៃទី១១ ខែ ឧសភា ឆ្នាំ ២០២៥ នៅចំណុចមុខ ហាងចិន (ផ្ទះបាយ ជៀស៊ាំង) ផ្លូវ២៣២កែង១១១ សង្កាត់បឹងព្រលិត ខណ្ឌ៧មករា រាជធានីភ្នំពេញ។

នគរបាលបានឲ្យដឹងថា បុរសជនជាតិចិនមានឈ្មោះ លី ជែម៉ុង ភេទប្រុសអាយុ ៣៤ឆ្នាំ បុគ្គលិក ហួយវ័នផេ និងស្នាក់នៅបន្ទប់លេខ៥០៤ជាន់ទី៥ អគារហួយវ័នផេផ្លូវ២៣២កែង១១១ ភូមិ១សង្កាត់បឹងព្រលិត ខណ្ឌ៧មករា រាជធានីភ្នំពេញ។ កាន់លិខិតឆ្លងដែនលេខៈEJ16 51 209 បានដកហូតសម្ភារៈ និងវត្ថុតាងដកហូតរួមមាន៖ អាវុធខ្លីម៉ាកឡុក១៩ពណ៌ខ្មៅ លេខBGTB497, គ្រាប់កាំភ្លើងចំនួន០៨គ្រាប់, សំបកគ្រាប់ចំនួន២គ្រាប់, ទូរស័ព្ទដៃម៉ាកអាយហ្វូន7ពណ៌ផ្កាឈូក និងទូរស័ព្ទដៃម៉ាកអាយហ្វូន15promax ពណ៌ខ្មៅ។

តាមប្រភពព័ត៌មាន បានបញ្ជាក់ថា មុនពេលកើតហេតុ បុរសជនជាតិចិននោះ គ្រាន់តែសន្តិសុខ ហាមមិនអោយជក់បារីពេលចូលក្នុងហាងភោជនីយដ្ឋាន ស្រាប់តែទាញកាំភ្លើងខ្លី បាញ់គំរាម ចំនួន០២គ្រាប់ បង្កការភ្ញាក់ផ្អើល ត្រូវបាននគរបាលចុះជួញអន្តគមន៍ឃាត់ខ្លួនភ្លាមៗ។

បច្ចុប្បន្ន ​ជនសង្ស័យត្រូវបាននគរបាលខណ្ឌ៧មករា ឃាត់ខ្លួន កសាងសំណុំរឿងបញ្ជូនទៅតុលាការ ដើម្បីអនុវត្តតាមនីតិវិធី៕ អត្ថបទ៖ កុម្ភៈ