យោងតាមសេចក្តីថ្លែងការណ៍របស់វិមានក្រឹមឡាំងចេញផ្សាយកាលពីថ្ងៃទី ១១ ឧសភា លោកប្រធានាធិបតីរុស្ស៊ី Vladimir Putin បាននិយាយតាមទូរស័ព្ទជាមួយប្រធានាធិបតីទួរគី លោក Recep Tayyip Erdogan ពិភាក្សាអំពីសំណើរបស់ទីក្រុងមូស្គូ ដើម្បីបន្តការចរចាដោយផ្ទាល់ជាមួយអ៊ុយក្រែននៅទីក្រុងអ៊ីស្តង់ប៊ុល ចាប់ពីថ្ងៃទី ១៥ ខែឧសភា។

ជំនួបតាមទូរស័ព្ទនេះ បានធ្វើឡើងតាមការអញ្ជើញរបស់លោក Putin នៅមុនថ្ងៃសម្រាប់អ៊ុយក្រែន ចាប់ផ្តើមកិច្ចចរចាឡើងវិញ ដែលយោងតាមមន្ត្រីរបស់វិមានក្រឹមឡាំង លោក Yury Ushakov ប្រទេសរុស្ស៊ីចង់ផ្អែកលើលក្ខខណ្ឌនៃការពិភាក្សានៅទីក្រុងអ៊ីស្តង់ប៊ុលឆ្នាំ ២០២២ និងស្ថានភាពបច្ចុប្បន្ននៅលើសមរភូមិ។

វិមានក្រឹមឡាំងបាននិយាយថា មេដឹកនាំទាំងពីរបានពិភាក្សាលម្អិតអំពីគំនិតផ្តួចផ្តើមរបស់រុស្ស៊ី ហើយលោក Erdogan បានសម្តែងការគាំទ្រយ៉ាងពេញទំហឹង ដោយបានរំលឹកឡើងវិញនូវការត្រៀមខ្លួនរបស់ទួរគីក្នុងការផ្តល់កន្លែង និងជួយរៀបចំការចរចា។

វិមានក្រឹមឡាំងបានដកស្រង់សម្តីលោក Erdogan ថា ប្រទេសទួរគីនឹងផ្តល់ជំនួយដែលអាចធ្វើទៅបានដើម្បីជួយសម្រួលដល់កិច្ចពិភាក្សា និងការខិតខំប្រឹងប្រែងក្នុងគោលបំណងដើម្បីសម្រេចបាននូវសន្តិភាពប្រកបដោយនិរន្តរភាព ។

ជំនួបមេដឹកនាំទាំងពីរបានកើតមានឡើង ស្របពេលរុស្ស៊ីជំរុញឱ្យមានការចរចាបន្តនៅក្រុងអ៊ីស្តង់ប៊ុល ខណៈកំពុងបន្តការវាយលុកដោយយោធានៅអ៊ុយក្រែន។ ទីក្រុង Kyiv បាននិយាយថា ខ្លួនត្រៀមជាស្រេចដើម្បីពិភាក្សា ប៉ុន្តែទទូចថា ការចរចាណាមួយត្រូវតែចាប់ផ្តើមដោយការបញ្ឈប់អរិភាពទាំងស្រុង៕