ប្រទេសចិន នឹងធ្វើជាម្ចាស់ផ្ទះនៃកិច្ចប្រជុំកំពូល ដែលរួមបញ្ចូលដៃគូពាណិជ្ជកម្មអាមេរិកឡាទីនដ៏សំខាន់របស់ខ្លួនក្នុងសប្តាហ៍នេះ ក្នុងកិច្ចខិតខំប្រឹងប្រែងដើម្បីជំរុញឥទ្ធិពល និងភាពជាដៃគូនៅក្នុងតំបន់ ខណៈទីក្រុងប៉េកាំង និងទីក្រុងវ៉ាស៊ីនតោន ព្យាយាមលុបបំបាត់សង្គ្រាមពាណិជ្ជកម្មរបស់ពួកគេ។

ក្រុមមន្ត្រីមកពីសហគមន៍រដ្ឋអាមេរិកឡាទីន និងតំបន់ការ៉ាអ៊ីប ហៅកាត់ថា CELAC រួមទាំងប្រធានាធិបតីប្រេស៊ីល កូឡុំប៊ី និងឈីលី គ្រោងនឹងចូលរួមកិច្ចប្រជុំថ្នាក់រដ្ឋមន្ត្រីនៃវេទិកា ចិន-CELAC នៅទីក្រុងប៉េកាំង នាថ្ងៃអង្គារ ១៣ ឧសភា ស្អែកនេះ។ ពាណិជ្ជកម្មទ្វេភាគីរវាងចិនជាមួយប្លុកនេះមានតម្លៃ ៤២៧ពាន់លានដុល្លារ ពីខែមករា ដល់ខែកញ្ញា ឆ្នាំ២០២៤ នេះបើយោងតាមទិន្នន័យរបស់ចិន។

ប្រធានាធិបតីចិន លោក Xi Jinping នឹងថ្លែងសុន្ទរកថាទៅកាន់កិច្ចប្រជុំកំពូលនេះ។ វេទិកាចិន-CELAC នេះបានតតាំងនឹងការត្រួតត្រាភូមិសាស្ត្រនយោបាយ និងសេដ្ឋកិច្ចរបស់អាមេរិកយូរមកហើយនៅក្នុងតំបន់ ជាអ្វីដែលរដ្ឋបាលលោកប្រធានាធិបតី Donald Trump ចង់ប្រឆាំង ហើយព្រឹត្តិការណ៍នេះកើតឡើងបន្ទាប់ពីចុងសប្តាហ៍នៃកិច្ចចរចាពាណិជ្ជកម្មអាមេរិក-ចិន ដែលបានបញ្ចប់ដោយភាពវិជ្ជមាន និងការកាត់បន្ថយពន្ធរវាងចិន-អាមេរិក រហូតដល់ ៩០ថ្ងៃ។

វេទិកាចិន-CELAC ដែលជាវេទិកាកិច្ចសហប្រតិបត្តិការអន្តររដ្ឋាភិបាលរវាងចិន និងប្រជាជាតិអាមេរិកឡាទីន និងសមុទ្រការ៉ាអ៊ីប គឺជាកត្តាជំរុញមួយក្នុងការពង្រឹងកិច្ចសន្ទនារវាងចិន និងប្លុកនេះ ស្តីពីពាណិជ្ជកម្ម កិច្ចសហប្រតិបត្តិការវិនិយោគ និងហេដ្ឋារចនាសម្ព័ន្ធ ក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់ចិន៕